كلام من جوة

بستغرب قوي على ناس عايشة في إنكار وبيبقى واضح قوي إن حملهم حمل كاذب بس برضه هما متوقعين إنهم هيجيبوا أطفال طيب بالزمة هو فيه حمل في الدنيا بيفضل سنين؟! ولو كان حمل حقيقي مش كان زمانه إتولد الجنين؟! والحقيقة ده إسمه عدم صواب إنك تفضل تعمل نفس الحاجة وتتوقع إن يكون فيه إختلاف ونفسي النهاردة تراجع نفسك وتشوف إيه الوهم  اللي إنت ماسك فيه بإصرار يمكن تكون الحاجة دي علاقة أو ضعف فشلت إنك تتغلب عليه أو طريقة تفكير خلاص قدمت ومابقتش مناسبة للعصر اللي إحنا فيه وأياً كانت الحقيقة اللي بتهرب منها أنا بترجاك تواجه وماتعش في أكاذيب لحسن تخسر في الأخر نفسك وتلاقي عمرك قصادك بيضيع وبدل ما تخدع روحك بحمل كاذب إدي نفسك فرصة تجيب أطفال حقيقيين. ماري منير 8/10/2012

صعب قوي تكون بريء في زمن بقى فيه البشر ذئاب شكلهم من بعيد جذاب ومُبهر بس متخفيين في ثياب حملان وعشان كده مش بسهولة تكتشفهم غير بعد لما يكون حصل الإنتهاك وحتى لو إنت فاكر نفسك حويط برضه ممكن تاخد منهم على قفاك بس يمكن ده يخليك المرة اللي جاية تاخد بالك وتبقى عاملهم حساب بس لو إنت عبيط هتفضل مكمل بدل ما تاخد عبرة م اللي فات أو حتى تبقى بتنفخ في الزبادي وتتحول لإنسان شكاك بس أنا نفسي تكون شخص واعي وتحاول تعمل إتزان ما بين الطيبة الحلوة والحكمة اللي تحميك م الناس عشان تقدر تكون نفسك من غير ما تتعرض لإيذاء ما هو الدنيا من غير براءتك وطيبتك صعب قوي إنها تتعاش وعشان كده إحنا محتاجين حد زيك يفكرنا يعني إيه إنسان وربنا يكتر من أمثالك ويحفظك من شر الناس. ماري منير 9/9/2012

أنا راضية أموت مرة واحدة بس ماموتش بالبطيء ومش عايزة أتعلق بحبال دايبة عمرها ما هتوصلني لشيء ما هو ساعات بيكون اليأس أفضل بكتير من خيبة الأمل والوجع لو مرة إتحس أرحملي من إني أعيش بيه وعشان كده أنا قررت البعد لأن القرب ماكانش مريح وأنا بإرادتي إخترت الفقد بدل ما أعيش في واقع مرير ما أنا مش هقدر أعيش في الوهم وأعشم روحي باللي عمري ما هوصل ليه وفيه حاجات لازم ندفنها قبل ما تعفن وريحتها تفيح وياما ناس عاشت شايلة جثة لأنها ماسكة فيها ومش قادرة تسيب وبرغم إنها بتكون معورة إيدهم بس بيبقوا مش عايزنها تضيع مع إنهم هيرتاحوا لو إتخلصوا منها قبل ما تشوه كل شيء فيهم أصيل لكن ساعات الجوع بيبقى أسرهم وبيحولهم مع الوقت لعبيد وأحسنلهم يشتروا روحهم ويختاروا  القتل الرحيم صحيح هيتوجعوا شوية وكمان هيحتاجوا لتأهيل بس برغم إن السكة طويلة وصعبة أفضل بكتير من إن الواحد يعيش ذليل. ماري منير 22/8/2012

محتاج حب ومش لاقيه بشكل نضيف فبتقبل تاخده متعاص بتراب وبدل ما يرويك بتعطش أكتر وكإنك بتجري ورا سراب؟ محتاج حنية وحضن يحسسك بالأمان فبترمي نفسك في حضن مليان بالأشواك بدل ما يضمك بينتهكك وبيستغل الإحتياج؟ محتاج تسمع كلمة حلوة وتشجيع وبدل ما تاخدهم من حد شايفك مميز تسمعهم من ناس مش شايفة غير براك؟ محتاج تلاقي حد جنبك وقت الأزمات وبدل ما تحس إنك معاه مش لوحدك تلاقيه نكد عليك وقلب عيشتك لمرار؟ محتاج حد يحسسك بالإهتمام وبدل ما يسأل عليك عشان يطمن تلاقيه خنقك بالأسئلة والتحكمات؟ محتاج تاخد لأنك مجرب الحرمان وبدل ما تشبع تلاقي نفسك مع حد بيحسسك بالإستنزاف لأنه بيستغلك عشان هو كمان زيك محتاج؟ أو حتى تلاقي حد عمال يديك عطاء مزيف لأن الحقيقة إنه معتمد على إحتياجك لإنسان يقبلك ويحن عليك ويحسسك إنك متشاف؟ يمكن تحس من كلامي إني بحبكها وبقفلها عليك بس الحقيقة إني مقدرة قوي جوعك وحاسة بيك وإحتياجك ده طبيعي وحق من الحقوق اللي ليك المشكلة مش في الإحتياج لكن في طريقة التسديد لأنها بدل ما تشبعك بتض

لو إنت وثقت يوم في حد وطلع مش قد ثقتك عايزة أقولك أنا حاسة بيك ومقدرة حجم صدمتك لأنه ماكنش عليك أمين وإستغل قلة خبرتك وحتى لو كان قلبك بريء فدي مش غلطتك وصحيح الصدمة مؤلمة قوي والجرح ممكن يفضل معلم لكن برضه إحنا لسة عايشين وياريت من غلطتنا نتعلم إن البشر دول بني آدمين مش شياطين ولا ملايكة يعني بالضعف مليانين وفي الأخر كلنا غلابة بس برضه بلاش تعميم وإوعى تلزق في الناس خبراتك وماتقولش كل الناس وحشين وتفقد الثقة في علاقاتك عشان ماتلاقيش نفسك وحيد لمجرد إنك تحمي ذاتك م احنا لبعض محتاجين مادام مش بنقرب بزيادة وياريت نحط للناس حدود ومانسبش بابنا مفتوح ع الأخر وفي نفس الوقت نبقى حساسين لو اللي قدامنا حبّ يتّاخر المهم نحافظ على مسافة بينا تحمينا وتحمي الأخر ولو اللي قدامنا تعدى على حدودنا ياريت مانسكتش ونواجه مع إحنا لازم نأكد على حقوقنا عشان الصبر برضه له أخر ولو كتمنا هنلاقي روحنا إتقفلنا وخسرنا في الأخر العلاقة وعلى فكرة أنا مش بقولك كلام نظري

عارف يعني إيه تكون محروم من كلمة حلوة ولما تتقالك ماتقدرش تحس بيها؟ عارف يعني إيه تكون عمرك ما جربت الحنية ولو حد طبطب عليك تتوجع وماتستحملش الطيبة؟ عارف يعني إيه تكون هتموت م الجوع ولما تلاقي الأكل معدتك ماتهضموش؟ عارف يعني إيه تكون ماحستش إنك محبوب ولما تلاقي اللي يديلك الحب ده ماتستوعبوش؟ عارف يعني إيه يكون جرحك مفتوح ولو حد حط عليه مُطهر تصرخ بعزم الصوت؟ عارف يعني إيه تكون ماعشتش طفولتك ولما تجيلك فرصة إنك تنطلق وتلعب تحس نفسك مشلول؟ عارف يعني إيه تكون مابتعرفش غير إنك تدي ولو حد إداك تحس بالذنب وكإن مالكش حقوق؟ لو مش عارف حاول تكون حساس وتحس بألمك وألم الناس ولو عارف قول وخليك جدع وماتهربش م الإحساس بالوجع ده مهما إن كان مؤلم من غيره ماتبقاش إنسان. ماري منير 6/7/2012

جربت تحس إنك لوحدك  وانت وسط الناس لأنك عزلت نفسك  لما مادوكش إهتمام؟ جربت تنجرح من أي حد وخلاص لأنك مش عارف قيمتك  وده بيخليك حساس؟ جربت تبقى برموز كبيرة مبهور ولما تقرب تلاقي نفسك منهم مصدوم لأنك إكتشفت إنهم مش حقيقيين وبيعملوا عكس اللي بيقولوه؟ وبدل ما تتعلم إن هما كمان بشر تعمم وتشك في كل البني آدمين؟ جربت تشتكي م الوحدة وانت اللي قافل على روحك لأنك إتلسعت من الشوربة وبتحمي نفسك م الجروح؟ جربت تغلوش على وجعك عشان ماتنهارش وتكمل حياتك عادي وكإنك لسه عايش بس الحقيقة إنك مت؟ جربت حتى إنك تكون  على خلاف العادة مبسوط وبدل ما تستمتع ... تقلق وتقول "خير اللهم إجعله خير" ؟ جربت تحتاج وماتطلبش عشان مايتقلش عليك ضعيف؟ ولو حد عرض عليك مساعدة ترفض أو تعمل نفسك عبيط؟ ولا قررت إنك أصلاً ماتعوزش من كتر ما إحتاجت ومالقتش؟ جربت تبعد وانت هتموت ع القرب؟ ولو الحد اللي فارقلك قرب تقوم زقه ومديله شلوط؟ جربت لما تكون مضايق ومخنوق تروح منفجر في وش أي مخلوق وكإنه