جربت ؟

جربت تحس إنك لوحدك 

وانت وسط الناس

لأنك عزلت نفسك 

لما مادوكش إهتمام؟

جربت تنجرح من أي حد وخلاص

لأنك مش عارف قيمتك 

وده بيخليك حساس؟

جربت تبقى برموز كبيرة مبهور

ولما تقرب تلاقي نفسك منهم مصدوم

لأنك إكتشفت إنهم مش حقيقيين

وبيعملوا عكس اللي بيقولوه؟

وبدل ما تتعلم إن هما كمان بشر

تعمم وتشك في كل البني آدمين؟

جربت تشتكي م الوحدة

وانت اللي قافل على روحك

لأنك إتلسعت من الشوربة

وبتحمي نفسك م الجروح؟

جربت تغلوش على وجعك عشان ماتنهارش

وتكمل حياتك عادي وكإنك لسه عايش

بس الحقيقة إنك مت؟

جربت حتى إنك تكون 

على خلاف العادة مبسوط

وبدل ما تستمتع ... تقلق

وتقول "خير اللهم إجعله خير" ؟

جربت تحتاج وماتطلبش

عشان مايتقلش عليك ضعيف؟

ولو حد عرض عليك مساعدة

ترفض أو تعمل نفسك عبيط؟

ولا قررت إنك أصلاً ماتعوزش

من كتر ما إحتاجت ومالقتش؟

جربت تبعد وانت هتموت ع القرب؟

ولو الحد اللي فارقلك قرب

تقوم زقه ومديله شلوط؟

جربت لما تكون مضايق ومخنوق

تروح منفجر في وش أي مخلوق

وكإنه مخدة بتعض فيها

أو حتى سجارة تنفخ فيها وقت اما تعوز؟

وبعد ده كله تقول هو اللي مستفز وعصبني

وانت يا عيني بريء مظلوم؟!

جربت تشاور على عيوبك في غيرك

لأنك رافض فيهم اللي مش قابله فيك؟

ولو حد مرة وراك عيبك

تثور وتقلب التربيزة عليه؟

جربت لما تكون خايف تقوم منفوخ

وتعمل نفسك غضنفر

وتنزل في الناس طلطيش؟

ولا تعيل وتجري أو حتى تتجمد

وصوتك يروح مايجيش؟

جربت تريح دماغك 

عشان ماتبقاش مهموم

قومت قصيت أغلبك 

ورضيت تعيش محدود؟

جربت تحس إنك مطمن 

وبعيد عن الزيطة

لأنك خوفت وماغمرتش 

ومشيت جنب الحيطة؟

أنا بصراحة جربت م اللي إتقال حاجات

إنت بقى جربت حاجة من كل اللي فات؟

ولا دورت ومالقتش نفسك بين السطور

وكإنك أعمى مش شايف برغم النور؟!

طب خلاص بلاش كل ده وقولي

جربت تكون على طبيعتك

وماتعملش حساب للناس؟

جربت تعبر عن رأيك بصراحة

حتى لو هتنداس؟

جربت تُبدع وتعمل 

اللي غيرك ماعملهوش؟

جربت تحلم وتفضل ورا حلمك

لغاية ما يتحقق ويخرج للنور؟

جربت تكون حقيقي في علاقاتك

وتنفتح فيها بس بحدود؟

جربت تاخد وتدي

وتعيش الحياة بشكل موزون؟

جربت لما حد يكون جرحك

تعاتبه وتقوله أنا موجوع؟

جربت تحبه وتقبله زي ما هو

من غير تغيير أو شروط؟

جربت الأول تحب نفسك

وتقبلها بالمميزات والعيوب؟

ولما تعمل حاجة حلوة تشجعها

أو على الأقل تقبل 

إن الناس تقول عليك موهوب؟

ولو حتى غلطت تحاسبها 

من غير طلطيش أو لوم؟

جربت طيب تكون واعي بمشاعرك

وتقفش الأفكار اللي وراها؟

وتقول للفكرة دي آه 

وللفكرة دي لأ؟

جربت تعبر عن نفسك وكمان تسمع

من غير ما توعظ أو حتى تنصح؟

جربت تحترم اللي قدامك

وكمان تحترم نفسك؟

عارف لو عملنا كده

الدنيا هتبقى حلوة بناسها

حتى لو كانوا مختلفين

بدل ما نكون مش طايقين روحنا

ومن بعضنا هربانين

أنا عن نفسي ناوية أجرب اللي ماجربتوش

عشان لازم أعمل مش بس أقول

أصل اللي مايبتديش بنفسه

مش من حقه يشاور على أخوه

وأنا ماقدرش أغير غيري

لكن أقدر أشتغل على نفسي

وأبقى إنسان مسئول

هتجرب بقى معايا؟

ولا هتطنش وتقول على كلامي

مالهوش أي لزوم؟!



ماري منير