كلام من جوة

الإحتياج بيبقى شيء صعب ومؤلم خصوصاً لما مابتلاقيش اللي يملاه وممكن من كتر صعوبته تنكر وتقول أنا مش محتاج بس حتى لو كنت عامل نفسك قوي وعايش وهم الإكتفاء أكيد هيجي عليك وقت وتضعف وتحس بالإحتياج لما تكون جعان حب وإهتمام ونفسك تسمع كلمة حلوة متعاصة بحنان لما تكون خايف ومحتاج حد جنبك يطبطب عليك ويقولك ماتخفش أنا معاك لما تكون زهقان وحاسس بالوحدة ومحتاج ناس يحسسوك بالونس والأمان لما تكون مفتقد حد عزيز على قلبك ومحتاج وجوده في أصعب الأوقات لما تكون موجوع ومنهار ومحتاج حد يشاركك ألمك ويحس باللي جواك لما تكون في عز فشلك ومحتاج تشجيع يشيل عنك الإحباط لما تكون بتحاول تتغير بس عاجز ومحتاج مساعدة من براك لما تكون بني آدم حقيقي أكيد غصب عنك هتحتاج. ماري منير 12/8/2013

مش قادرة أكمل ومش قادرة أسيب مش قادرة أموت ومش قادرة أعيش وبجد ده شيء مؤلم و وضع سخيف ما هو صعب إني أكون مش طايلة سما ولا أرض صعب إني أكون في وضع مش قادرة أحطله حد صعب يكون لازم أختار ما بين أمرين أسوء من بعض صعب يكون الألم غير محتمل صعب إني يكون فيه حاجات مافيهاش أمل صعب إن الحياة تكون غصب وبصراحة ده مش عدل مش عدل إني ماكنش موجودة بإرادتي مش عدل إني مايتاخدش رأيي مش عدل إن الكبير يجبرني وفي الأخر يسمي ده حب ! ماري منير 2/8/2013

لما يكون مطلوب مني إني أسمع وأنا نفسي موجوعة ومش قادرة لما تكون محتاج إني أشيل حملك وأنا أصلاً فطسانة ومحتاجة مساعدة لما في تعبك تلجألي وتلاقيني مش متاحلك وتحس إني بزقك وتتخيل إني بتهرب منك لما أحتاجك وألاقيك بتلومني وأنا بغرق ويبقى مطلوب مني أستحمل وأقبل وبعد ده كله آجي على نفسي وأحايلك عشان بس أنا مايرضنيش زعلك لما يكون مطلوب مني أدي وأنا في تعبي متسابة لوحدي فعذرني لو لاقتني غير متاحة أو بقيت خارج نطاق الخدمة. ماري منير 28/5/2013

مش عايزة حد يُعجب بيا إعجاب مايخلنيش أتواجه مع حقيقتي أو يمنعني إني أشوف عجزي أنا محتاجة حد يشوفني على بعضي بجمالي وبكل وحشتي مش عايزة قبول يخليني أريح وماحاولش أغير من نفسي مش عايزة تشجيع طول الوقت لأني باحتاج أوقات لقلم يفوقني قلم يهزني ويرج حياتي الركدة قلم يوجع بس مايعمليش عاهة قلم يعري كل دفاعاتي حتى لو هيخليني إنسان أعزل ماتشوفنيش من بعيد وتنبهر أو حتى تقرب وتُعجب بدماغي لأن أنا مش اللي إنت شايفه من بعيد ولا أنا الأفكار الحلوة اللي بقت جزء من كياني أنا إنسانة من لحم ودم وحياتي ماليها الخزي خزي العجز والعيا والسكون لحد الملل فمن فضلك ماتُعجبش وماتنبهرش وتتخيل إني ناضجة وعايشة حياتي شوفني على حقيقتي وإتصدم أحسن ما ترسم صورة لبنت حلوة ... بس مش أنا ! ماري منير 11/4/2013