القتل الرحيم
أنا راضية أموت مرة واحدة
بس ماموتش بالبطيء
ومش عايزة أتعلق بحبال دايبة
عمرها ما هتوصلني لشيء
ما هو ساعات بيكون اليأس
أفضل بكتير من خيبة الأمل
والوجع لو مرة إتحس
أرحملي من إني أعيش بيه
وعشان كده أنا قررت البعد
لأن القرب ماكانش مريح
وأنا بإرادتي إخترت الفقد
بدل ما أعيش في واقع مرير
ما أنا مش هقدر أعيش في الوهم
وأعشم روحي باللي عمري ما هوصل ليه
وفيه حاجات لازم ندفنها
قبل ما تعفن وريحتها تفيح
وياما ناس عاشت شايلة جثة
لأنها ماسكة فيها ومش قادرة تسيب
وبرغم إنها بتكون معورة إيدهم
بس بيبقوا مش عايزنها تضيع
مع إنهم هيرتاحوا لو إتخلصوا منها
قبل ما تشوه كل شيء فيهم أصيل
لكن ساعات الجوع بيبقى أسرهم
وبيحولهم مع الوقت لعبيد
وأحسنلهم يشتروا روحهم
ويختاروا القتل الرحيم
صحيح هيتوجعوا شوية
وكمان هيحتاجوا لتأهيل
بس برغم إن السكة طويلة وصعبة
أفضل بكتير من إن الواحد يعيش ذليل.
ماري منير
22/8/2012
كلام حقيقي جداً مع انو صعب ويمكن يوجع ويجرح ولاكن للاسف يمكن يكون الحل الوحيد لمشاكل كتير
ردحذف