كلام من جوة

فيه علاقات كتير في حياتنا بيجي عليها وقت ومدة صلاحيتها بتنتهي، والأسباب كتير، وكمان الطريقة اللي بتنتهي بيها بتختلف من علاقة للتانية. يعني فيه مثلاً اللي بتنتهي بعد مواجهة حاسمة، وفيه اللي بتفضل تتقطع وترجع كل شوية، وفيه اللي بتنتهي في صمت من غير ما حد فيهم ينطق بكلمة! وأياً كانت الأسباب اللي أدت لانهاء العلاقات دي، فأنا بشوف إن طريقة القطع دي فن: إنك ماتجرحش الطرف التاني وإنت بتبعد.. فن. إنك تواجهه بعيوبه اللي أدت لانهاء العلاقة من غير ما تحسسه بالذنب.. برضه فن. وإنك تقطع مرة واحدة بشكل حاسم.. أكيد فن. بس لو العلاقات دي كانت من الأصل مريضة، والطرفين ماعندهمش النضج الكافي إنهم يعملوا علاقات صحية، فطبيعي إن طريقة القطع تكون استكمالاً لسلسلة العك اللي كان حاصل في العلاقة وأدى للنهاية دي، وساعتها بقى هيكون أقصى أملنا إنهم يقدروا يبعدوا بشكل نهائي لوقف نزيف الدم، ومش بعيد نضطر بعدها نلم أشلاء جثثهم اللي كانوا مكملين عليها، برغم كل الإساءات والاستخدام اللي بيبقى  موجود في العلاقات اللي من النوع ده. وعشان كده يُفضل إن يكون فيه حد بيساعدنا، عشان نقدر ننهي العلاقة بأقل قدر من

الفقد مؤلم بكل أشكاله، بس فيه اللي بيبقى جرحه نضيف فبيخف مع مرور الوقت، وفيه اللي جرحه ملوث بيفضل مفتوح ومش بيلم، زي مثلاً جرح الموت، برغم إنه مؤلم وبيسيب أثر جوانا، بس في الغالب بيكون جرحه نضيف، ومش بيحتاج فتح وتنضيف، لكن أكيد بيحتاج وقت. أما بقى فقد علاقة بحد لسة عايش، ففي معظم الأحيان بيكون وراه جرح ملوث، حتى لو كنا إحنا اللي واخدين قرار القطع، لأن ممكن يكون السبب ورا القطع ده إن العلاقة كانت مش صحية، أو مُسيئة ومافيش أمل في تحسين الوضع، وده بيخلينا نحتاج وقت لغاية ما نتخلص من التأثير السلبي للعلاقة دي. بس كمان الجرح بيبقى أصعب لو كان الطرف التاني هو اللي واخد القرار ده، لأن ساعتها مش بس هنبقى موجوعين من الفقد، لكن كمان هنعاني من الشعور بالرفض، وخصوصاً لو القطع ده حصل بشكل عنيف، أو حتى بالتجاهل من تحت لتحت. وأكيد كلنا فقدنا ناس قريبين لينا سواء بالموت أو بالقطع، وفي رأيي إن الحالة التانية دي أصعب وألمها أشد، لأنهم بيفضلوا قدام عينينا، بس خلاص مابقاش ينفع إننا نكون قريبين من بعض، زي فقد حد كنا هنرتبط بيه، أو فقد شريك حياتنا بالإنفصال أو الطلاق، أو فقد صديق عزيز علينا كان ل

الأصعب من إنك ماتتسمعش إنك تتسمع وماتتحسش الأصعب من إن ماحدش يهتم بيك إنك تاخد إهتمام مزيف الأصعب من إنك تكون وحيد إنك تحس بالوحدة وفيه ناس كتير حواليك الأصعب من إنك تكون يتيم إن أهلك يتجاهلوك أو يسيئوا ليك الأصعب من الفشل عدم المحاولة من الأصل الأصعب من اليأس الخذلان وخيبة الأمل الأصعب من الألم إنك تتوجع في صمت الأصعب من الموت إنك تعيش حياتك غصب الأصعب من الإلحاد إنك تُعبد إله مشوه لا انت قادر ترمي طوبته ولا تصدق إنه مُحب الأصعب من أصعب شيء إنك تكون واقف في النص لا انت طايل سما ولا حتى طايل أرض وتفضل طول عمرك عامل زي اللي رقصوا ع السلم مزنوق في حتة ضيقة لا انت برة ولا جوة وتبان وكإنك بتاخد بس انت مابتاخدش ويحسبوك عايش وانت من جوة ميت وكل أمَلك تموت يا تعيش الحياة بنِفس. ماري منير 6/12/2013

الإحتياج بيبقى شيء صعب ومؤلم خصوصاً لما مابتلاقيش اللي يملاه وممكن من كتر صعوبته تنكر وتقول أنا مش محتاج بس حتى لو كنت عامل نفسك قوي وعايش وهم الإكتفاء أكيد هيجي عليك وقت وتضعف وتحس بالإحتياج لما تكون جعان حب وإهتمام ونفسك تسمع كلمة حلوة متعاصة بحنان لما تكون خايف ومحتاج حد جنبك يطبطب عليك ويقولك ماتخفش أنا معاك لما تكون زهقان وحاسس بالوحدة ومحتاج ناس يحسسوك بالونس والأمان لما تكون مفتقد حد عزيز على قلبك ومحتاج وجوده في أصعب الأوقات لما تكون موجوع ومنهار ومحتاج حد يشاركك ألمك ويحس باللي جواك لما تكون في عز فشلك ومحتاج تشجيع يشيل عنك الإحباط لما تكون بتحاول تتغير بس عاجز ومحتاج مساعدة من براك لما تكون بني آدم حقيقي أكيد غصب عنك هتحتاج. ماري منير 12/8/2013

مش قادرة أكمل ومش قادرة أسيب مش قادرة أموت ومش قادرة أعيش وبجد ده شيء مؤلم و وضع سخيف ما هو صعب إني أكون مش طايلة سما ولا أرض صعب إني أكون في وضع مش قادرة أحطله حد صعب يكون لازم أختار ما بين أمرين أسوء من بعض صعب يكون الألم غير محتمل صعب إني يكون فيه حاجات مافيهاش أمل صعب إن الحياة تكون غصب وبصراحة ده مش عدل مش عدل إني ماكنش موجودة بإرادتي مش عدل إني مايتاخدش رأيي مش عدل إن الكبير يجبرني وفي الأخر يسمي ده حب ! ماري منير 2/8/2013

لما يكون مطلوب مني إني أسمع وأنا نفسي موجوعة ومش قادرة لما تكون محتاج إني أشيل حملك وأنا أصلاً فطسانة ومحتاجة مساعدة لما في تعبك تلجألي وتلاقيني مش متاحلك وتحس إني بزقك وتتخيل إني بتهرب منك لما أحتاجك وألاقيك بتلومني وأنا بغرق ويبقى مطلوب مني أستحمل وأقبل وبعد ده كله آجي على نفسي وأحايلك عشان بس أنا مايرضنيش زعلك لما يكون مطلوب مني أدي وأنا في تعبي متسابة لوحدي فعذرني لو لاقتني غير متاحة أو بقيت خارج نطاق الخدمة. ماري منير 28/5/2013

مش عايزة حد يُعجب بيا إعجاب مايخلنيش أتواجه مع حقيقتي أو يمنعني إني أشوف عجزي أنا محتاجة حد يشوفني على بعضي بجمالي وبكل وحشتي مش عايزة قبول يخليني أريح وماحاولش أغير من نفسي مش عايزة تشجيع طول الوقت لأني باحتاج أوقات لقلم يفوقني قلم يهزني ويرج حياتي الركدة قلم يوجع بس مايعمليش عاهة قلم يعري كل دفاعاتي حتى لو هيخليني إنسان أعزل ماتشوفنيش من بعيد وتنبهر أو حتى تقرب وتُعجب بدماغي لأن أنا مش اللي إنت شايفه من بعيد ولا أنا الأفكار الحلوة اللي بقت جزء من كياني أنا إنسانة من لحم ودم وحياتي ماليها الخزي خزي العجز والعيا والسكون لحد الملل فمن فضلك ماتُعجبش وماتنبهرش وتتخيل إني ناضجة وعايشة حياتي شوفني على حقيقتي وإتصدم أحسن ما ترسم صورة لبنت حلوة ... بس مش أنا ! ماري منير 11/4/2013

بتحب بجد وعايز مصلحة اللي قدامك ولا جعان وبتمسك فيه من كتر الإحتياج؟ شايفه بجد ومهتم بمشاعره ولا إنت بس محصور جواك؟ بتفتقد بجد ناس عزيزة على قلبك ولا بتعاني من أعراض إنسحاب؟ بتدي بجد ونفسك تساعد غيرك ولا بتشتري الحب بالعطاء؟ بتحتمل بجد عيوب القريبين منك ولا بتعدي عشان ماتكونش بتتساب؟ شاري بجد وباقي ع الناس في علاقاتك ولا بتخنق حريتهم عشان يفضلوا معاك؟ طب بتحترم بجد حريتهم في البعد عنك ولا حاسس بالرفض وبتبرر الإنسحاب؟ مُكتفي بجد ومش محتاج لناس تساعدك ولا عامل نفسك قوي وبتنكر الإحتياج؟ بتعمل حدود بجد عشان تحمي نفسك ولا خايف ومحاوط روحك بأسوار؟ على العموم سواء كنت كده أو كده فأنا مش هدفي أشكك في ذمتك أنا نفسي بس تتأكد من دوافعك لحسن تكون معمي عن اللي جواك وفارقلي ماتكونش بتضر نفسك أو تضر غيرك بالقرب أو الإبتعاد. ماري منير 24/2/2013

ممكن لما أحتاجك تسمعني تحاول تحس اللي وجعني؟ ممكن ماتقوليش كلام نظري وتقّدر واقع عجزي؟ ممكن ماتوعظنيش وبالذنب ماتحسسنيش؟ ممكن كمان ماتنصحنيش وتقولي إعملي وماتعمليش؟ ممكن برضه ماتفضلش ساكت وكإن مافيش حد ليا سامع؟ ممكن ترد على مشاعري بمشاعر وتكون مع كلامي بتتفاعل؟ ممكن تحط نفسك مكاني وتقَّدر وتشوف الدنيا من منظوري وتخرج برة نفسك؟ لو مش هتقدر تعمل كده يبقى في حالي سيبني وماتجيش وتقولي شاركي عشان أنا ما باصدق وباحكي لأني محتاجة حد يسمعني وبرغم إني مش باشارك غير حد واعي بس اللي أنا باطلبه شيء صعب ونادر ومش أي حد يقدر يعمله حتى لو كان فاهم لغة المشاعر بس مش عايزة برضه أفقد الأمل ويمكن في يوم ألاقي اللي يسمعني ويرد عليا بشكل يفرقلي ويملا دماغي. ماري منير 9/2/2013

بتعرف لما تحس حاجة تعبر عن مشاعرك بالكلام؟ عشان توصف مشاعر إيجابية أو حتى سلبية كمان؟ بتعرف الأول تميزها جواك وتقفش نفسك لما تحس إحساس معين وتحاول تشوف إيه اللي وراه؟ ولا كتير بتلاقي نفسك متنح وكإنك عيل تايه ومحتاج حد يلقاه؟ ويمكن تكون إنت شيلت الفيشة عشان تريح روحك من العذاب أو من زمان ضايعة نفسك منك لأن ماحدش علمك تميز وتعبر عن الأحاسيس اللي بتكون مالياك وماتعرفش غير لغة العقل والمنطق وإنك تتكلم بس على مستوى الآراء ولو حد غلبان فك نفسه شوية وعبر قدامك عن مشاعر ضغطاه يبقى يا حرام هتكون ليلته سودة وهيتطحن بالنصايح والآيات وكإنه وقف قدام قطر مجري كمل عليه وفرمه من كل إتجاه والغريبة إنك ممكن تكون تعبان زيه أو حتى أكتر منه كمان وبدل ما تشفق عليه وتقّدر ظروفه تروح مطلع عليه بلاك والمصيبة بقى لو كنت متعلم وفي لغة المشاعر أستاذ بس بدل ما يساعدك علامك إنك تقّدر وتحس الناس تلاقي نفسك بتستسهل وتقوم مِرجَع عليهم المعلومات وكإنك حافظ كلمتين وبتلطعهم عشان تتفوق في