خلاص قررت أسيب الحضانة !
خلاص قررت أسيب الحضانة
لأني مش حاسة إن ده المكان اللي بانتمي ليه
أصل الكراسي كانت عليا ضيقة
والمكان سقفه واطي
مش عارفة أفرد طولي فيه
أما بقى المنهج كان طبعاً أ - ب
وعلموني إن "ب" لازم تكون بطة
وكإن ماينفعش تبقى مثلاً بقرة
لأنهم عايزني مُبرمجة
ومش سمحينلي أضيف أي شيء جديد
ومن البديهي إنه كان مطلوب مني
إني أمشي في الصف جنب إخواتي
والمفروض إني مازوغش
ولا أروح شمال أو يمين
ولو في يوم قليت عقلي وخرجت
العقاب ساعتها هيبقى شديد
بس برضه الحضانة دي مش وحشة
أنا بس اللي مش واخدة ع التلقين
ومابحبش أتعلم بطريقة تزغيط البط
لكن بفضل الإبتكار في التعليم
بس هعمل إيه و ده نظام التعليم عندنا
اللي عايز ناس حافظين .. مش فاهمين
وأنا ماينفعش أعترض
وأقول يا جماعة ده تهريج
لأني لما بقول كده
بيقولوا عليا متمردة
وكمان بيتهموني بالتجديف
وياريتني كنت عارفة أرضى وأسكت
وأعيش مهدية سري زي الباقيين
أصل الوحدة عليا صعبة
والأسهلي إني أموت مع الميتين
اللي متخيلين يا عيني
إنهم في الحياة لسة عايشين
لكن الحقيقة إنهم ماتوا وريحتهم فاحت
والغريبة إنه ماحدش شامم الريحة غيري
بس مين عارف يمكن اللي حواليا مزكمين
أنا خايفة إني أكون كده خرفت
ومش بعيد أكون وصلت للجنون
أصل أنا كنت متعودة أتلم وأسكت
بس فجأة نطقت وطلعلي صوت
وبعد ما كنت عاقلة وراسية
بقيت عايزة أثور وواجه الخوف
اللي فيا وفي اللي حواليا
حتى لو هتكون نهايتي الموت
ومش نفعني تاني أستخبى
لكن لازم أجازف وأخرج للنور
ما انا زهقت من العيشة في الضلمة
ومن السكنى في القبور
ومش ناوية أطاطي تاني
وأعدي الليلة عشان تفوت
بس ربنا يستر ومارجعش في كلامي
وأبقى عيلة لابسة طرطور
لكن أنا عايزة أكبر وأواجه
وماخفش إني أكشف المستور
حتى لو إتقال عليا دي خابت
أو حتى إتهموني بالجنون
وأنا خلاص هرمي روحي ورزقي
ع الله اللي وازن القلوب.
ماري منير
26/7/2010
ربنا معطيكى حاجة حلوة. انتى عندك حاجة حقيقية صدقيها وسيبى نفسك ليها. كونى فيها واديها وقتك وبالك واهى ارض بتزرعيها. ماتخافيش مهما طال الوقت أكيد حتحصديها
ردحذف