ألم الفقد

الفقد مؤلم بكل أشكاله، بس فيه اللي بيبقى جرحه نضيف فبيخف مع مرور الوقت، وفيه اللي جرحه ملوث بيفضل مفتوح ومش بيلم، زي مثلاً جرح الموت، برغم إنه مؤلم وبيسيب أثر جوانا، بس في الغالب بيكون جرحه نضيف، ومش بيحتاج فتح وتنضيف، لكن أكيد بيحتاج وقت.

أما بقى فقد علاقة بحد لسة عايش، ففي معظم الأحيان بيكون وراه جرح ملوث، حتى لو كنا إحنا اللي واخدين قرار القطع، لأن ممكن يكون السبب ورا القطع ده إن العلاقة كانت مش صحية، أو مُسيئة ومافيش أمل في تحسين الوضع، وده بيخلينا نحتاج وقت لغاية ما نتخلص من التأثير السلبي للعلاقة دي. بس كمان الجرح بيبقى أصعب لو كان الطرف التاني هو اللي واخد القرار ده، لأن ساعتها مش بس هنبقى موجوعين من الفقد، لكن كمان هنعاني من الشعور بالرفض، وخصوصاً لو القطع ده حصل بشكل عنيف، أو حتى بالتجاهل من تحت لتحت.

وأكيد كلنا فقدنا ناس قريبين لينا سواء بالموت أو بالقطع، وفي رأيي إن الحالة التانية دي أصعب وألمها أشد، لأنهم بيفضلوا قدام عينينا، بس خلاص مابقاش ينفع إننا نكون قريبين من بعض، زي فقد حد كنا هنرتبط بيه، أو فقد شريك حياتنا بالإنفصال أو الطلاق، أو فقد صديق عزيز علينا كان ليه دور في حياتنا مهم.

وأكتر حاجة مؤلمة في الفقد هي الحنين والذكريات اللي بتزود الاشتياق ده، والأصعب لو الشخص اللي فقدناه لسة عايش، عشان بيفضل جوانا صراع إننا مانكلموش ولا نقرب منه، وناس كتير مش بتقدر تستحمل ده، وعشان كده بيفضلوا رايحين جايين في العلاقات دي، ومش بيقدروا يسيبوا بعض، وبرغم إنهم ممكن يكونوا عمالين يجرحوا في بعض، بس بيفضلوا مكملين على جثثهم من كتر ما هما مش قادرين ع البعد.

أنا أحياناً باحس من كتر صعوبة ألم الفقد، إنه عامل زي أعراض الانسحاب اللي بتكون عند المدمن اللي كان بيتعاطى مواد مُخدرة وبيحاول يبطلها، وعلى قد ما كانت العلاقة اللي فقدناها صحية، على قد ما هتكون أعراض انسحابها أقل، والعكس لو كانت غير صحية فأعراض انسحابها هتكون غير مُحتملة وهتاخد وقت، ومش بعيد من كتر ألمها نرجعها، أو حتى نرمي روحنا في علاقة تانية بنفس الشكل.

وفي النهاية أنا عايزة أقول لكل حد بيعاني من الألم ده، إني حاسة بيك قوي ومقدرة حجم وجعك وألمك، لأني أنا كمان عانيت منه ومازلت، وعشان كده أتمنى إنك ماتكونش بتعديه لوحدك، وإن يكون فيه ناس جنبك بتحسك وتساندك لحد ما تجتاز ألم الفقد.

ماري منير

7/10/2013