التعلق العاطفي

العلاقات العميقة بتأثر فينا، ومش بيبقى سهل علينا نتحمل فقدانها، بس أكتر علاقات بنتعلق فيها هي العلاقات العاطفية، وعشان كده لما بنفقدها بنحس بألم لفترة طويلة، وبيبقى غير مُحتمل، والذكريات الحلوة تفضل تضغط علينا وكإنها شبح عمال يطاردنا، وبيبقى مُصاحب ليها أفكار سحرية، ممزوجة بأمل وهمي إن العلاقة دي ممكن ترجع، وبنفضل لفترة مش قادرين نستحمل نشوف أي حاجة بتفكرنا بالشخص اللي كنا في يوم من الأيام قريبين قوي منه.

والسؤال اللي بيبقى عمال يُصرخ جوانا: لإمتى هفضل متعلق؟ وإمتى هقدر أعيش حياتي من غير ما تكون واقفة على حد خلاص مابقاش ينفع يكون ليا؟ 

والحقيقة إن مفيش وقت محدد، لأن ده بيتوقف على حاجات كتير: 

منها درجة القرب في العلاقة، وطول مدتها، وعمقها، ومدى صحتها أو مرضها، وكمان بيفرق طبيعة شخصياتنا إذا كنا عاطفيين أو عقلانيين، أو بنميل للاستقلالية أو الاعتمادية، وطبعاً عدد الانتكاسات سواء من ناحيتنا أو من ناحية الطرف الآخر.

بس فيه حاجات محتاجين نعملها عشان تساعدنا نتخلص من التعلق ده في أسرع وقت ممكن، وده في حالة لو كان تعلقنا طبيعي مش مرضي، ومن أهم الحاجات دي إننا لازم نوقف أي تواصل، ونبعد عن أي حاجة بتفكرنا بالشخص ده. يعني ياريت نحاول على قد ما نقدر إننا مانتواجدش في أماكن من المحتمل إنه يكون بيروحها، وكمان لازم نعمل بلوك في كل وسائل الإتصال عشان مايبقاش متاح قدامنا، ولا نشوف أي صور أو أي حاجة ليه ممكن تفكرنا، وأكيد لازم نبعد عن الأماكن اللي كنا بنروحها معاه، لأن وجودنا في نفس المكان هيثير ذكرياتنا ويزود حنينا.

بس بجانب كل ده لازم يحصل عملية إحلال، عشان مانكونش شيلنا حاجات كانت مهمة في حياتنا من غير ما نحط شيء تاني مكانها. وياريت يكون عندنا شبكة علاقات تساندنا، وتساعدنا في ملي الفراغ اللي اتساب بعد ما فقدنا العلاقة، ويُفضل يكون فيه أنشطة بنشغل نفسنا فيها، سواء مع ناس تانية أو لوحدنا، لأن الوحدة والفراغ بيصعبوا علينا الموضوع قوي.

ولأن تنفيذ كل ده هيكون صعب علينا قوي، فإحنا محتاجين ناس جنبنا تساعدنا نعمل الإجراءات دي برغم صعوبتها، وفي كل مرة هيكون جوانا رغبة مُلحة إننا نتواصل أو نشوف الشخص اللي كنا معاه في علاقة، لازم نلجأ في لحظتها لحد يلحقنا، ويساعدنا نتجاوز حالة الشعوذة اللي بنكون فيها، لأن أي انتكاسة في الموضوع ده بتخلينا وكأننا بنبدأ السكة من الأول. بس لو انتكاسنا ده شيء طبيعي و وارد جداً إنه يحصل، وعشان كده هنكون محتاجين نسامح روحنا، ونقوم تاني ونكمل لغاية ما نقدر نتخلص من التعلق. 

أما بقى لو كنا بنعاني من التعلق المرضي، ففي الحالة دي هنكون محتاجين نمشي سكة مع حد متخصص، عشان نقدر نتعافى، ونقدر نحب تاني بس بشكل واعي وصحي، ونبدأ حياة جديدة مع الشخص المناسب اللي فعلاً يستاهلنا.

ماري منير

27/12/2013