الاستغلال العاطفي

الاستغلال أنواعه كتير، بس أنا حبة أركز في المقال ده عن الاستغلال العاطفي أو الجنسي، والاستغلال بيختلف عن الاعتداء، لأنه بيحصل بموافقة الشخص اللي بيُستغَل، بس الموافقة دي في الغالب بتكون تحت ضغط أو مناورة وخداع من الطرف الآخر، عشان كده بيبقى صعب رفضها، لأن الموضوع مابيبقاش بالوضوح ده، لكن أغلب الناس اللي اتعرضوا لاستغلال عاطفي أو جنسي، كان الطرف التاني معلقهم بشوية كلام ومشاعر مش حقيقية، وليهم طرق غير مباشرة وملتوية، بتخلي ضحياهم يتلخبطوا مهما كانت درجة ذكائهم ووعيهم، وممكن أي حد يتعرض لده، لأن الناس دي ليها أساليبها ومحترفة في المناورة، والظهور بوجه عكس تماماً حقيقتهم.

والناس اللي بتتعرض للنوع ده من الاستغلال، مش بس بنات زي ما هو شائع، لكن فيه كمان رجالة بتتعرض لده، بس طبعاً في الغالب البنات هي اللي بتتعرض لده أكتر. وفيه تطرفين ممكن يروحلهم الناس اللي اتعرضوا للاستغلال، والتطرف الأول إنهم يحسوا نفسهم ضحايا، ومالهمش أي دور في اللي حصل، وده شيء خطير جداً، لأنهم بالطريقة دي مش بيكتشفوا نقط ضعفهم اللي أدت إنهم يقعوا ضحايا للناس دي، وبالتالي ممكن يتعرضوا تاني للاستغلال على إيدين ناس تانية.

أما بقى التطرف التاني إنهم يحسوا قوي بالذنب والخزي، ويكونوا لايمين نفسهم جداً، لدرجة إنهم مايكونوش قادرين يشوفوا خالص مسؤولية الشخص اللي استغلهم، ولا حتى يكونوا موجوعين منه، وبالتالي مابيعدوش على مراحل النوح أو الفقد أو الصدمة، اللي المفروض يعدي فيها أي حد اتعرض لإيذاء جامد أو صدمة من أي نوع، وهما خمس مراحل، وأول مرحلة إنهم يكونوا في البداية بينكروا ومش قادرين يستوعبوا اللي حصل، وبعدين لما الإنكار ده يروح ويواجهوا حقيقة اللي حصل، بيخشوا في مرحلة الغضب، وممكن غضبهم ده يشمل ناس كتير مالهمش ذنب، وممكن يوجهوا الغضب ده ناحية ربنا، لأنه سمح إن ده يحصلهم، أو ممكن حتى يوجهوا الغضب ده ناحية نفسهم، في حالة لو هما حاسين بالذنب زي ما قولت.

وتالت مرحلة بيعدوا فيها هي الفصال والمساومة، والمرحلة دي بيكون فيها أفكار سحرية، زي إني أقول مثلاً إني لو كنت عملت الحاجة الفلانية، ماكانش ده حصل، أو أتخيل إن لو عملت دلوقت حاجة معينة، ممكن أسترد الشخص ده، أو إني يكون عندي أمل سحري إن الشخص ده ممكن يرجع، وطبعاً كل لأن كل دي أوهام مش هتحصل، ومش هتغير من نتيجة اللي حصل، فلما الشخص يحس إنه خلاص غلب حماره ومفيش أمل، ساعتها بيخش في مرحلة الاكتئاب، وبيحس بالخسارة، وإنه خسر حاجات كتير بسبب الاستغلال اللي اتعرضله.

وكل المراحل دي مالهاش وقت معين، وممكن مرحلة منهم تاخد وقت أكتر من المراحل التانية، وأفضل مثلاً وقت طويل في الإنكار أو الغضب أو المساومة أو الاكتئاب، لغاية ما أوصل لأخر مرحلة وهي القبول، بس ممكن كمان إني بعد ما أعدي في كل المراحل دي، إني أرجع تاني من الأول، بس ده مش معناه إني إنتكست، لكن في المرة التانية صعوبة المراحل دي بتقل، أو على الأقل وقتها بيكون أقل، وأقدر أخرج منها أسرع من المرة السابقة.

بس للأسف الشخص اللي حاسس بالذنب، ولايم نفسه إنه اتورط في علاقة زي دي، ممكن ده يمنعه إنه يعدي في المراحل دي، لأنه مش بيبقى شايف إنه اتعرض للخداع والاستغلال، لكن بيكون حاسس إن هو اللي غلطان بس، لأنه سمح بكده، وبالتالي مش بيبقى موجوع من الشخص اللي أذاه ولا محتاج يغفرله، لكن الشخص اللي بيبقى محتاج فعلاً يغفرله في الحالة دي، هو نفسه.

ولو إنت حاسس بالذنب، فأنا مش هضحك عليك وأقولك إنك مش مسؤول ومالكش دور في اللي حصل، لكن في نفس الوقت مسؤولية الشخص التاني أكبر، وخصوصاً لو كان مُقدم رعاية إنت وثقت فيه، زي إنه يكون رجل دين أو معالج، وكمان هو المسؤول عن فعله، وإنت بس مسؤول عن رد فعلك، ورد الفعل عمره ما يتسوى مع الفعل، ده غير إنه هو خدعك و ورطك معاه من غير ما تاخد بالك، وعشان كده بيبقى صعب جداً إنك تكتشف خداعه لو ماكانش ليك خبرة وتجارب سابقة مع ناس بالشكل ده، وحتى لو كنت مريت بخبرة شبيهة بكده، ممكن بسبب نقط ضعفك توقع تاني في حاجة زي كده، وعشان كده ضروري جداً إننا نكتشف عيوبنا واحتياجاتنا الغير مسددة اللي بتخينا أكثر عرضة لده، ونشتغل ع الحاجات دي، عشان نجنب نفسنا الوقوع في ده مرة تانية.

وفي النهاية إحنا محتاجين للاتزان في رؤيتنا للي حصل، عشان لما نشوف عيوب اللي قدامنا نتجنب الشخصيات اللي عندها نفس المشاكل، وكمان نشوف عيوبنا ونشتغل عليها، عشان نحمي نفسنا من أي استغلال أو أذى، وأكيد إحنا محتاجين ناس تساعدنا عشان نتجاوز كل اللي حصل، ونتعافى من تأثيره السلبي.

ماري منير

لو عندك سؤال أو مشاركة راسلنا على صفحة المدونة على الفيسبوك 

https://www.facebook.com/كلام-من-جوة-295925033874007