الاحتياج العاطفي

الاحتياج العاطفي احتياج مهم قوي في حياتنا، وممكن يكون عامل بناء لو بيقودنا في النهاية لعلاقة صحية ومُشبعة مع شريك الحياة المناسب، وممكن يكون كمان عامل هدم لو كان بيدفعنا لعلاقات غير صحية في وقت غير مناسب، أو مع أشخاص غير مناسبين لمجرد تسديد الاحتياج ده، لأن الاحتياج ده مُلح جداً، وممكن من كتر إلحاحه نرمي روحنا في أي علاقة والسلام عشان نسكت جوعنا للحب.

والنوع ده من الاحتياج مش بس مقتصر على الناس اللي لسة مارتبطوش بحد، لكن كمان فيه كتير متجوزين بس حاسين بفراغ عاطفي وبيدوروا على حد يملاه بأي شكل، وللأسف ماحدش كبير قصاد الاحتياج ده، ومن واقع خبرتي شوفت معالجين وحتى رجال دين متجوزين وبيتورطوا في علاقات عاطفية، وممكن يضحكوا على روحهم ويسموها علاقة صداقة، وهي في الحقيقة بتحمل كل المشاعر الرومانسية اللي بتأثر عليهم وبتعلقهم، حتى لو مش مواجهين روحهم بحقيقة العلاقات دي.

وياما سمعت ناس بيعانوا من علاقات مُسيئة، بس مش قادرين يسيبوها بسبب جوعهم اللي بيخليهم مربوطين ومش قادرين يبعدوا عن بعض، وحتى لو قدروا لفترة ممكن يرجعوا تاني وكإن مفيش أي إهانة حصلت أو جرح، أو حتى ممكن يكون فيه أسباب بتمنع إنهم يرتبطوا ببعض، بس برغم ده يفضلوا مكملين مع إنهم كده بيضيعوا وقت، وياريته كان بفايدة، لكن بالعكس كل دقيقة بيقضوها في العلاقة دي بتعلقهم أكتر وبتصعب عليهم البعد، وبدل ما احتياجهم يتسدد بيزداد عمق.

بس مش معنى كده إن الاحتياج ده غلط، بالعكس ده احتياج شرعي وضروري، لأن كل واحد من حقه إنه يتمتع بعلاقة مُشبعة مع إنسان يشاركه حياته، بس ده مش بيحصل غير لو الطرفين قرروا يخرجوا برة نفسهم، ويبذلوا روحهم للآخر في علاقة مقدسة بتُكلل بالزواج وبتكمل بالحب، الحب اللي مبني على الاختيار والوعي، مش مجرد احتياج ورغبة في الأخذ، ولو كنا داخلين العلاقة دي وإحنا مركزين على روحنا ومش شايفين الآخر، يبقى ده إسمه استخدام مش حب. صحيح إحنا محتاجين ناخد زي ما بندي، بس المهم إننا مانكونش شايفين غير نفسنا ومش فارق معانا غير إننا ناخد وبس، وحتى لما ندي يكون ده من منطلق قوة مش ضعف، عشان مانكونش بنشتري الحب، وبالتأكيد الاتزان بين الأخذ والعطاء مهم.

أنا عارفة إن الكلام ده عملياً ممكن يكون صعب قوي، خصوصاً ع الناس اللي عمر ما احتياجها ده اتسدد، ومستنية اليوم اللي فيه تاخد بفارغ الصبر، بس لو مش قادرين ناخد وندي بشكل مُتزن وصحي، مش عيب إننا نطلب مساعدة من ناس ممكن تمشي معانا سكة، لغاية ما نبقى قادرين نعمل علاقات صحية فيها نكون بنحب ونتحب.

ماري منير

19/10/2013