القاع موت!

القاع شيء مؤلم جداً وأكيد ماحدش يحب يوصل ليه، بس برغم ده أحياناً بيكون هو الحل الوحيد: 

لما نكون بنخسر خساير فادحة بسبب سلوك أو شيء معين... بس برضه مكلمين.

لما نكون محتاجين نتغير... بس مريحين. لما نكون عاجزين وفاقدين السيطرة... بس بننكر ومُصرين إننا كويسين.

لما نكون مكملين على جثثنا في علاقات بتستنزفنا... بس خوفنا من الفقد والخسارة أو اعتماديتنا ع العلاقات دي مخلينا معميين.

لما يكون خوفنا شاللنا وموقف حياتنا... بس إحنا هربانين.

وكل واحد فينا ممكن يكون عنده مشكلة معينة محتاج يواجهها ويتعامل معاها، بس كمان كل واحد فينا قاعه بيبقى مختلف عن أي حد غيره، حتى لو كان بيعاني من نفس المشكلة اللي بيعاني منها شخص تاني، عشان كده ماينفعش تعمم قاعك على كل الناس اللي بيصارعوا مع مشكلة إنت عانيت منها قبل كده أو مازلت بتصارع معاها، لأن اللي ممكن يكسرك إنت أو يجيب أخرك شيء مختلف تماماً عن اللي ممكن يأثر في غيرك، واللي ممكن إنت تستحمله، ممكن غيرك مايستحملوش، واللي ممكن يخليك تنهار، ممكن يعدي عادي على حد غيرك من غير ما يزنقه نفس زنقتك.

واختلاف قاع كل واحد ده بيرجع لعوامل كتير، زي مثلاً أولوياتي وإيه أكتر حاجة بتفرق معايا، وكمان درجة المتانة عندي واحتمالي للضغوط ، وطبعاً درجة إنكاري، وطريقة تعاملي مع المشاكل، ومدى نُضجي ووعيي، وشكل وحجم الخساير.

بس مهما كانت الأسباب والعوامل اللي ممكن تكون وصلتنا للقاع، مش كل الناس بتقدر تُحسن استغلاله، وللأسف أوقات كتير ممكن نتعامل مع القاع ده بالهروب ونغلوش وننكر أكتر، ونلهي روحنا بأي حاجة تنسينا الخساير وواقع عجزنا عشان مانحسش بيه.

وبرغم إني أحياناً باحس إني جايبة قاع، بس بدل ما أهرب منه، بحاول أبعد عن أي شيء ممكن يلغي إحساسي بيه، عشان أنا مدركة إن القاع ده ممكن يكون في مصلحتي، لأن القاع ممكن يوصلني للي المفروض أوصل ليه. 

القاع ممكن يفوقني ويخليني أعمل حاجة مختلفة عن اللي متعودة عليه.

القاع ممكن يكون الدافع اللي يخليني أبني اللي اتهدم من جديد، أو أتعايش وأقبل اللي ماقدميش فيه غير القبول. القاع موت، بس إحنا اللي بنختار يكون بعديه حياة، ولا نكمل مدفونين بالحيا وعايشين قلة موت!

ماري منير

8/12/2014