إكرام الميت دفنه
الدفن عملية شاقة جداً ومؤلمة، وممكن من كتر صعوبته نتعامل معاه بالإنكار،
ونرفض نواجه روحنا إن خلاص الميت مات. ومش شرط الميت ده يكون شخص عزيز على قلبنا
وفقدناه، لكن ممكن كمان يكون علاقة حميمة انتهت، أو حلم كان عندنا أمل إنه يتحقق، بس
في الأخر طلع سراب، وممكن يكون ماضي مليء بالإساءات، أو حتى طفولة ماعشنهاش.
وأياً كان الشيء اللي فقدناه، أكيد هنحتاج ندفنه ونعمله جنازة. بس الصعوبة
بقى إننا ممكن مانكونش قادرين نقبل الواقع ده، وعشان كده ممكن نكون محتفظين في
حياتنا بجثث عفنت، وريحتها بقت مالية المكان، وتفضل الريحة منغصة علينا عيشيتنا،
وحياتنا توقف ع الشخص أو الشيء اللي فقدناه.
وأصعب شيء في نظري هو دفن الماضي والعلاقات، لأن الماضي والأشخاص الأحياء
ممكن يفضلوا يطاردونا ويعذبونا، حتى لو قدرنا ندفنهم بعد ما نكون إتعاملنا مع خسارتنا
بوعي وإدراك، وصعوبة الحاجتين دول إن بيبقى فيهم أطراف تانية ممكن يصعبوا علينا
الموضوع.
يعني مثلاً لو الماضي بتاعنا كان مؤلم بسبب أشخاص لسة عايشين وليهم تأثير
على حياتنا، ساعتها الحاضر هيكون استكمالاً للماضي اللي كان مليان بالإساءات، حتى
لو كانت سلبية زي الترك والإهمال. وفي الموقف ده بقى الواحد مش بيبقى عارف هيلاحق
على إيه ولا إيه، ويبكي وينوح ع اللي حصل في الماضي، ولا كمان ع الضرر المستمر
اللي بنتعرضله في الحاضر، وبيقلب علينا القديم والجديد، ويبقى مش بس مطلوب مننا
إننا نتعامل مع اللي حصلنا زمان، لكن كمان نتدرب على مهارات تساعدنا نحمي نفسنا من
الإيذاء، زي الحدود، وتوكيد الحقوق، والمواجهة، والعتاب.
أما بقى العلاقات المنتهية، فحتى لو ربنا قدرنا وقبلنا أخيراً إننا ننوح
عليها وندفنها، فممكن الطرف التاني يفضل ماسك فينا ومايقدرش يطلقنا بسلام، ويجي
بكل بساطة ينبش ويطلع الميت من المقابر بعد ما صدقنا إننا دفناه. ونفضل وقت
متلخبطين، ونحس بأمل إننا ممكن نكون دفنا العلاقة وهي لسة فيها الروح، وبنبقى تحت
إغراء إننا نرجعها برغم كل الأسباب اللي أدت في الأصل للإنهاء. ويا نضحك بقى على
روحنا ونرجعها، يا نضطر آسفين كل مرة ندفن العلاقة من أول وجديد، ونعيد نفس شريط
الألم بكل تفاصيله المحزنة من إنكار، وغضب، ومساومة، واكتئاب.
وعشان كده هرجع وأقول الدفن صعب ومؤلم قوي، بس ماقدمناش بديل تاني، وإلا
هندفن نفسنا بالحيا مع اللي مات. ويا إما نواجه اللي حصل عشان نقدر نتجاوزه، يا
هنفضل طول عمرنا نعاني، ونبقى محاسوبين بالغلط مع الأحياء، وعشان كده أنا بتمنى
إننا نختار الحياة، حتى لو هنضطر نمشي سكة طويلة وصعبة، بس المهم إننا نعيشها
بشرف، مش وإحنا دفنين راسنا في التراب.
ماري منير
23/12/2013
أزال أحد مشرفي المدونة هذا التعليق.
ردحذف