جنة من غير ناس ما تنداس

العلاقات من أهم الحاجات اللي مهم قوي وجودها في حياتنا، لأنها بإختلاف أنواعها ليها دور مؤثر وحيوي جداً في تكوينّا ونضوجنا، وحتى بقاءنا على قيد الحياة، ومش باحسه مبالغة أبداً المثل اللي بيقول: "جنة من غير ناس ما تنداس".
وجود حد جنبنا هو اللي بيدي للحياة طعم، هو اللي بيدفينا في عز البرد، وهو اللي بيساعدنا إننا نواجه التحديات برغم صعوبتها، وبيهون علينا الألم.

وعلى قد ما هتكون العلاقات دي صحية ومُشبعة، على قد ما هنقدر نكبر في جو مريح وآمن. بس حتى العلاقات الصعبة والمؤلمة ممكن تكون بمثابة تحدي لينا يدربنا على تكوين مهارات أساسية، زي الحدود، وتوكيد الحقوق، والعتاب، والمواجهة. والمهارات دي مهمة جداً عشان نقدر نحمي نفسنا، ومانبقاش طول الوقت بنتعرض لإساءات بتشوهنا وتجرحنا.

وأهم ميزة وعيب في نفس الوقت، إن العلاقات هي أكتر حاجة ممكن تعرينا وتكشف عيوبنا، وده طبعاً بيبقى شيء مؤلم لينا، بس من غيرها مش هنقدر نشوف نفسنا بعمق، ولو حتى شوفنا فالعلاقات هي اللي بتزنقنا إننا نتغير ونطور من نفسنا عشان نحافظ على العلاقات دي، أو على الأقل عشان نتجنب الألم الناتج عن إحتكاكنا ببعض، وكمان ممكن تكون بمثابة مؤشر بيساعدنا نقيس مدى تقدُمنا وتحسُنا، أو حتى إنتكاسنا ورجوعنا لورا.

بس من كتر أهمية العلاقات، سهل قوي إننا نمسك فيها بشكل مرضي يعيق نمونا، ويُخنق الشخص اللي قدامنا، أو نتورط في علاقة اعتمادية فيها تواطؤ من الطرفين. وبرغم إن إحتياجنا للعلاقات ده شيء شرعي، ممكن يتحول بسبب عدم نضوجنا لعلاقات مليانة سيطرة وعك، وبدل ما تكون مُشبعة، توجع بطننا وتجبلنا تلبُك معوي، وعشان كده أي حاجة في حياتنا محتاجة لإتزان ونُضج.

وممكن يكون فيه كتير مننا متورط في علاقات مش صحية، أو حتى مفتقد وجود علاقات مُشبعة في حياته، وللأسف مفيش طريقة سهلة ممكن تخلينا نتمتع بعلاقات صحية ومُشبعة، لأن ده محتاج مجهود و وقت، ولو مامشيناش سكة نشتغل فيها على روحنا عشان نكبر، عمر ما الإحتياج ده هيتسدد بشكل صح. بس برغم كل المخاطر والتحديات اللي ممكن تقابلنا، فالموضوع يستاهل إننا نغامر، ونبادر، ونجرب، ونقوم، ونُقع، مش بس عشان إحتياجنا يتسدد، لكن كمان عشان نزداد نضوج و وعي.

ماري منير

8/1/2014