الدواء فيه سُماً قاتل!

فيه موضوع حبة أتكلم فيه، لأن للأسف فيه ضحايا كتير ليه، والموضوع ده ليه علاقة بالاستغلال العاطفي، واللي بيوصل في أحيان كتير للاستغلال الجنسي، والنوع ده من الاستغلال وارد أنه يحصل أكتر في العلاقات العاطفية.

بس فيه ناس كتير بيتعرضوا برضه للنوع ده من الاستغلال في علاقات المفترض إنها مش عاطفية، وممكن ماتكونش بالوضوح ده من الأول، لأن سهل قوي ساعتها إننا نرفض إن يكون فيه بينا علاقة من النوع ده، لكن المشكلة بتكون لما البداية بتكون خبيثة وماتتوقعش إنها تقلب لحاجة زي كده، زي إنها مثلاً تبدأ بعلاقة صداقة بريئة مع شخص ماينفعش يكون فيه بينا ارتباط أصلاً لأي سبب، أو الأسوء إنها تكون علاقة مساعدة مع رجل دين أو دكتور أو مشير.

وطبعاً الواحد في العلاقات دي مش بيبقى واخد خوانة، ولما ده بيحصل بتفضل وقت متلخبط، ولما تبتدي تحس إن فيه حاجة غلط، بتكون خلاص اتعلقت، وحتى في اللحظة دي مش بتبقى قادر تصدق أو تستوعب اللي بيحصل، وصعب جداً تشوف الحقيقة غير لما تطلع من العلاقة دي وتشوفها من برة، وساعتها مع الوقت هتبتدي تشوف الحقيقة بكل بشعتها، وتكتشف إنه كنت بتُستغل.

والمشكلة في العلاقات دي مش بس إنك بتتعرض للاستغلال، لكن كمان الناس دي بتخليك تتعلق عاطفياً بيهم، والتعلق ده ممكن يفضل فترة طويلة حتى بعد ما بتكتشف حقيقتهم، ويمكن ساعتها تستغرب نفسك وماتبقاش مستوعب إزاي إنت لسة متعلق بالشخص ده برغم كل اللي عمله وحتى بعد ما عرفت حقيقته، بس في الواقع ده شيء وارد جداً لو كنت بتعاني من الاعتمادية أو إدمان العلاقات زيه، وفيه ناس كتير بيعانوا من المشكلة دي من غير ما يكونوا مدركين لده، لأن بيبقى هدفهم المعلن من العلاقات دي هو الرغبة في الصداقة أو الارتباط.

بس حتى لو ماكنتش بتعاني من إدمان العلاقات، فأنت لما بتعمل علاقة مع حد مدمن علاقات أو نرجسي، ممكن يخليك إنت كمان تدمن العلاقة معاه، وعشان كده الموضوع بيبقى عامل زي تأثير المواد المخدرة، وكإن فيه حد كان بيحطلك مخدرات في القهوة أو العصير أو حتى الدوا من غير ما تاخد بالك، لغاية ما بتدمن العلاقة دي، وإنت مش بتبقى عارف ولا بتكتشف ده غير لما الحد ده يبعد عنك ولو حتى وقت قصير، ساعتها هتبتدي تحس بأعراض انسحاب للعلاقة دي وهتتعب.

 ولو في أحسن الظروف قدرت تبعد، فإنت حتى في الحالة دي مُعرض إنك تنكتس وترجع تاني لنفس العلاقة، لأن وارد جداً إنه يحاول يعمل أي حاجة عشان يجيب رجلك ويورطك معاه تاني، حتى لو كان هو اللي نهى العلاقة وقرر يرميك ويسيبك بعد ما يكون خلاص زهق وأخد اللي هو عايزه منك أو استبدلك بعلاقات تانية. ووارد برضه إن انت اللي تنتكس وتبادر ناحيته حتى لو كنت انت اللي نهيت العلاقة. 

وسواء الانتكاسات دي كانت من ناحيتك أو من ناحية الطرف الآخر، فهي بتصعب الموضوع أكتر وبترجعك لإدمان العلاقة دي من تاني، بس حتى بعد ما تبعدوا بشكل نهائي، التعلق ممكن يفضل فترة طويلة، وده هيبقى شيء مؤلم عليك، بس طبعاً الموضوع هيكون سهل على مدمن العلاقات، لأنه بيستبدلك بعلاقات تانية، وإنت هتفضل مزنوق وقت في العلاقة دي بالذات لو ماكنتش مدمن علاقات زيه، أو حتى لو كنت بتعانى من إدمان العلاقات ممكن تفضل متعلق بنفس العلاقة دي لو العلاقات اللي دخلتها مع ناس تانية ماسددتش الاحتياج القهري اللي عندك.

أنا عارفة إنك لو اتعرضت لشيء زي ده، فأكيد الموضوع صعب، وعلى قد ما إنت اتورطت في العلاقة دي، على قد ما تأثير ده عليك هيكون أصعب. بس لو إنت لسة متورط في علاقة بالشكل ده، وعايز تخرج منها ومش قادر، فبترجاك إنك تلجأ لحد يساعدك، لأن كل ثانية بتقضيها في العلاقة دي.. بتأذيك وبتعلقك أكتر. 

ولو إنت نجحت إنك فعلاً تبعد بس خايف إنك ترجعلها تاني، لأنك كل شوية بتنتكس وتضعف خصوصاً لو الطرف التاني هو اللي بادر، فبرضه إنت محتاج تتساعد، عشان تضمن إنك ماترجعش للعلاقة دي تاني، أو تدخل في علاقات تانية بنفس الشكل لو كنت بتعاني من الاعتمادية، وأكيد في الحالة دي هيحتاج إنك تمشي سكة عشان تتعافى من إدمانك.

أما بقى لو كنت خلاص سايب العلاقة دي بقالك فترة طويلة، بس لسة بتعاني من التعلق، أو من التأثير السلبي للعلاقة دي، فإنت محتاج تمشي سكة بمساندة حد لغاية ما تتفك من التعلق ده، أو تتعافى من تأثير الإيذاء أو الاستغلال اللي اتعرضتله، يعني في كل الأحوال إنت محتاج ناس تساعدك.

وبالنسبة للناس اللي ماتعرضوش لده، فأتمنى إنكم تخدوا بالكم، حتى مع أكتر الناس الأهل للثقة، لأن حتى الناس اللي إنت بتلجألهم عشان يساعدوك، ممكن يحطولك السم في الدواء، وياريت لو شكيتوا أو حسيتوا بأي حاجة مش مريحة في أي علاقة، وحاولتوا تحطوا حدود لكن مانفعتش، فياريت في الحالة دي تبعدوا خالص عن العلاقة دي، لأن الحدود للأسف مش هتحميكم،  ومدمنين العلاقات أو النرجسين مش هيقدروا يلتزموا بيها وأكيد هيكسروها.

ماري منير