ضعفك بيحليك
أنا عشت أغلب سنين حياتي وأنا نظري 6/6، بس من كام سنة عانيت من صداع رهيب ماكنتش قادرة بسببه أفتح عيني، فروحت أكشف نظر، وكانت المفاجأة إني لازم ألبس نضارة، والصدمة بالنسبالي لما عرفت إني لازم ألبسها على طول من أول ما أصحى لحد ما أنام، وبصراحة أنا ساعتها ماكنتش قادرة أتقبل ده خالص في الأول، وكنت مكسوفة إني أخرج بيها، وماكنتش كمان بحب أتصور بيها، وساعة لما اخترت أول نضارة ليا، كان نفسي قوي ألاقي نضارة ماتكونش باينة قوي، وفضلت مش بغيرها لأن كان صعب عليا أعيد نفس التجربة تاني.
بس بعد فترة لفت نظري شكل نضارات طالعة جديد إطارها إسود وسميك، والغريبة إنها عجبتني وحاسيت إنها محلية الناس اللي لابساها، ودي أول مرة أحس فيها إن نضارات النظر ممكن تخلي شكل الواحد أجمل، وعشان كده كان نفسي قوي أجربها عليَّ، وفعلاً دخلت محل نضارات وبدأت أجربها، وكتشفت إنها فعلاً حلوة عليا ومحلية شكلي، ولما جيت أجرب تاني الأنواع اللي إطارها رفيع أو حتى من غير إطار، ماحستش إنها بتضيف أي حاجة لشكلي، بالعكس حاسيت أكتر إني لابسة نضارة نظر بالشكل اللي ماكنتش قادرة أقبله في الأول، مع إن النضارات اللي عجبتني كانت ظاهرة أكتر، ومعرية حقيقية ضعف نظري من كتر ما هي باينة وواضحة، وكأن كل ما أحاول أخبي ضعفي.. بابقى أوحش، وكل ما أظهره وأطلعه للنور.. بزداد جمال، وأي حد بيبقى حقيقي وبيبين ضعفه عموماً.. بيبقى ليه جاذبية.
وبغض النظر إن موضوع النضارات ده في حد ذاته فرقلي، وساعدني إني مابقاش مضايقة من فكرة إني بلبسها، بس اللي حصل ده كمان خلاني أتأمل في حاجة تانية أعمق، وقعدت أفتكر كل اللي الناس اللي أعرفهم ومشيوا سكة طويلة اشتغلوا فيها على نفسهم بعد ما جابوا قاع واتزنقوا.. وساعتها لجأوا للمساعدة.
ففيه مثلاً اللي كان منهم مدمنين مخدرات، ودلوقتي بقوا معالجين إدمان، وفيه اللي منهم كمان وصلوا إنهم يكونوا مديرين لمراكز إعادة تأهيل، وفيه ناس كتير تانية كانوا بيعانوا من مشاكل نفسية مختلفة، ودلوقتي بقوا هما كمان مشيرين ناجحين ومتميزين وبيساعدوا ناس كتير في مشاكلهم، وفيه اللي وصل منهم لحد الشهرة، وكل ده بسبب المشكلة اللي كانت عندهم في الأول، ولما اشتغلوا عليها بقت مصدر قوة.
صحيح ممكن يكونوا لسة بيصارعوا مع ضعفات تانية، أو حتى مع نفس الضعف، وممكن كمان ينتكسوا، بس كل خبرة بيجتازوا فيها ويقوموا من بعدها، بتثقل شخصياتهم وبتزيد قدرتهم على الإحساس بالناس ومساعدتهم.
وأنا مش عارفة إنت إيه وضعك، وهل إنت ممكن تكون من الناس اللي اشتغلوا على نفسهم وقدروا يتغلبوا على ضعف معين، أو بقى عندهم أدوات تساعدهم يتعاملوا بشكل أفضل مع عجزهم وعيوبهم، و الخبرة دي خليتهم قادرين يحسوا بالناس ويقدّروا عجزهم، وكمان يساعدوا ويساندوا غيرهم في رحلة تعافيهم، ولا إنت لسة واقع وخجلان من عجزك؟
بس أياً كانت حالتك، فأنا عايزة أقولك إن أي ضعف إنت بتشغل عليه، الضعف ده ممكن يكون مصدر قوتك، ومن غيره مش هتكون الشخص اللي انت عليه دلوقت، أو الشخص اللي المفروض تكونه.
ضعفك ده بيميزك لو انت اخترت تصارع وتتعامل معاه بشرف.
ضعفك بيحليك لو انت مش بتخبيه.. لكن بتبينه.
ضعفك هو أكبر دليل على إنسانيتك.. ومن غيره هتفقد جزء مهم قوي منك.
ماري منير
4/11/2015
تعليقات
إرسال تعليق