كلام من جوة

أنا بكره ربنا اللي الناس بتفرضه علينا من غير أي احترام لحريتنا في الاختيار أنا بكره ربنا اللي شبه أهالينا عشان بسبب أخطاءهم اتشوهت صورة الله أنا بكره ربنا اللي مطلوب مني أعبده من خلال مُمارسات روحية اخترعوها بشر ومن ساعتها بقت قانون مُلزم لكل البني آدمين أنا بكره ربنا اللي بيفرض أو بيحرم حاجات هي في الأخر مجرد عادات وتقاليد أنا بكره ربنا اللي كل همه الصح والغلط ومش فارق معاه احتياجاتي واللي أنا حاسه بيه أنا بكره ربنا اللي مش شايف إن ليَّ قيمة في ذاتي وبيعطف عليَّ بحبه اللي عمال يذلني بيه أنا بكره ربنا اللي عايزنا متشابهين وماحدش يكون أصلي لكن تقليد أنا بكره ربنا اللي بيلغي عقلي وفكري لمجرد إن فيه ناس عايزانا مُغيبين أنا بكره ربنا اللي مقسمنا لناس وحشين وناس حلوين أنا بكره ربنا اللي بيميز الرجالة عن الستات ومش عايزهم يكونوا متساويين أنا بكره ربنا اللي عايزني أكتم مشاعري و وجعي وأمثل إني كويسة وبخير أنا بكره ربنا اللي عايزني أقوله كلام حلو مُنمق وأنا جوايا متهماه وبالوم عليه أنا بكره ...

الاحتياج العاطفي احتياج مهم قوي في حياتنا، وممكن يكون عامل بناء لو بيقودنا في النهاية لعلاقة صحية ومُشبعة مع شريك الحياة المناسب، وممكن يكون كمان عامل هدم لو كان بيدفعنا لعلاقات غير صحية في وقت غير مناسب، أو مع أشخاص غير مناسبين لمجرد تسديد الاحتياج ده، لأن الاحتياج ده مُلح جداً، وممكن من كتر إلحاحه نرمي روحنا في أي علاقة والسلام عشان نسكت جوعنا للحب. والنوع ده من الاحتياج مش بس مقتصر على الناس اللي لسة مارتبطوش بحد، لكن كمان فيه كتير متجوزين بس حاسين بفراغ عاطفي وبيدوروا على حد يملاه بأي شكل، وللأسف ماحدش كبير قصاد الاحتياج ده، ومن واقع خبرتي شوفت معالجين وحتى رجال دين متجوزين وبيتورطوا في علاقات عاطفية، وممكن يضحكوا على روحهم ويسموها علاقة صداقة، وهي في الحقيقة بتحمل كل المشاعر الرومانسية اللي بتأثر عليهم وبتعلقهم، حتى لو مش مواجهين روحهم بحقيقة العلاقات دي. وياما سمعت ناس بيعانوا من علاقات مُسيئة، بس مش قادرين يسيبوها بسبب جوعهم اللي بيخليهم مربوطين ومش قادرين يبعدوا عن بعض، وحتى لو قدروا لفترة ممكن يرجعوا تاني وكإن مفيش أي إهانة حصلت أو جرح، أو حتى ممكن يكون فيه أسباب بت...

العلاقات العميقة بتأثر فينا، ومش بيبقى سهل علينا نتحمل فقدانها، بس أكتر علاقات بنتعلق فيها هي العلاقات العاطفية، وعشان كده لما بنفقدها بنحس بألم لفترة طويلة، وبيبقى غير مُحتمل، والذكريات الحلوة تفضل تضغط علينا وكإنها شبح عمال يطاردنا، وبيبقى مُصاحب ليها أفكار سحرية، ممزوجة بأمل وهمي إن العلاقة دي ممكن ترجع، وبنفضل لفترة مش قادرين نستحمل نشوف أي حاجة بتفكرنا بالشخص اللي كنا في يوم من الأيام قريبين قوي منه. والسؤال اللي بيبقى عمال يُصرخ جوانا: لإمتى هفضل متعلق؟ وإمتى هقدر أعيش حياتي من غير ما تكون واقفة على حد خلاص مابقاش ينفع يكون ليا؟  والحقيقة إن مفيش وقت محدد، لأن ده بيتوقف على حاجات كتير:  منها درجة القرب في العلاقة، وطول مدتها، وعمقها، ومدى صحتها أو مرضها، وكمان بيفرق طبيعة شخصياتنا إذا كنا عاطفيين أو عقلانيين، أو بنميل للاستقلالية أو الاعتمادية، وطبعاً عدد الانتكاسات سواء من ناحيتنا أو من ناحية الطرف الآخر. بس فيه حاجات محتاجين نعملها عشان تساعدنا نتخلص من التعلق ده في أسرع وقت ممكن، وده في حالة لو كان تعلقنا طبيعي مش مرضي، ومن أهم الحاجات دي إننا لازم نوقف ...

حياتنا أغلبها انتظار انتظار وراه انتظار ويا توصل للي مستنيه يا تلاقي قصادك حيطان وترجع تنتظر من تاني حاجة تملا الفراغ وتتخيل إن المرة دي هتوصل مع إنك واقف في نفس المكان وعمرك عمال بيجري وأهي عيشة والسلام عايش على أمل إنك تلاقي رد أو تلاقي حد يشبع الاحتياج أو مستني حاجة تحصل تغيرلك المسار والأصعب لو كنت فقدت الأمل وعايش حياتك غصب واضطرار وبتسأل إيه اللي جابني هنا ولإمتى هفضل محسوب مع الأحياء ونفسك يبقى لانتظارك أخر وتوصل لأخر المشوار حتى لو كانت النهاية حزينة بس المهم يتحط حد للمعاناة وماتفضلش متعلق بين الموت والحياة. ماري منير 17/12/2013

فيه علاقات كتير في حياتنا بيجي عليها وقت ومدة صلاحيتها بتنتهي، والأسباب كتير، وكمان الطريقة اللي بتنتهي بيها بتختلف من علاقة للتانية. يعني فيه مثلاً اللي بتنتهي بعد مواجهة حاسمة، وفيه اللي بتفضل تتقطع وترجع كل شوية، وفيه اللي بتنتهي في صمت من غير ما حد فيهم ينطق بكلمة! وأياً كانت الأسباب اللي أدت لانهاء العلاقات دي، فأنا بشوف إن طريقة القطع دي فن: إنك ماتجرحش الطرف التاني وإنت بتبعد.. فن. إنك تواجهه بعيوبه اللي أدت لانهاء العلاقة من غير ما تحسسه بالذنب.. برضه فن. وإنك تقطع مرة واحدة بشكل حاسم.. أكيد فن. بس لو العلاقات دي كانت من الأصل مريضة، والطرفين ماعندهمش النضج الكافي إنهم يعملوا علاقات صحية، فطبيعي إن طريقة القطع تكون استكمالاً لسلسلة العك اللي كان حاصل في العلاقة وأدى للنهاية دي، وساعتها بقى هيكون أقصى أملنا إنهم يقدروا يبعدوا بشكل نهائي لوقف نزيف الدم، ومش بعيد نضطر بعدها نلم أشلاء جثثهم اللي كانوا مكملين عليها، برغم كل الإساءات والاستخدام اللي بيبقى  موجود في العلاقات اللي من النوع ده. وعشان كده يُفضل إن يكون فيه حد بيساعدنا، عشان نقدر ننهي العلاقة بأقل قد...

الفقد مؤلم بكل أشكاله، بس فيه اللي بيبقى جرحه نضيف فبيخف مع مرور الوقت، وفيه اللي جرحه ملوث بيفضل مفتوح ومش بيلم، زي مثلاً جرح الموت، برغم إنه مؤلم وبيسيب أثر جوانا، بس في الغالب بيكون جرحه نضيف، ومش بيحتاج فتح وتنضيف، لكن أكيد بيحتاج وقت. أما بقى فقد علاقة بحد لسة عايش، ففي معظم الأحيان بيكون وراه جرح ملوث، حتى لو كنا إحنا اللي واخدين قرار القطع، لأن ممكن يكون السبب ورا القطع ده إن العلاقة كانت مش صحية، أو مُسيئة ومافيش أمل في تحسين الوضع، وده بيخلينا نحتاج وقت لغاية ما نتخلص من التأثير السلبي للعلاقة دي. بس كمان الجرح بيبقى أصعب لو كان الطرف التاني هو اللي واخد القرار ده، لأن ساعتها مش بس هنبقى موجوعين من الفقد، لكن كمان هنعاني من الشعور بالرفض، وخصوصاً لو القطع ده حصل بشكل عنيف، أو حتى بالتجاهل من تحت لتحت. وأكيد كلنا فقدنا ناس قريبين لينا سواء بالموت أو بالقطع، وفي رأيي إن الحالة التانية دي أصعب وألمها أشد، لأنهم بيفضلوا قدام عينينا، بس خلاص مابقاش ينفع إننا نكون قريبين من بعض، زي فقد حد كنا هنرتبط بيه، أو فقد شريك حياتنا بالإنفصال أو الطلاق، أو فقد صديق عزيز علينا كان ل...

الأصعب من إنك ماتتسمعش إنك تتسمع وماتتحسش الأصعب من إن ماحدش يهتم بيك إنك تاخد إهتمام مزيف الأصعب من إنك تكون وحيد إنك تحس بالوحدة وفيه ناس كتير حواليك الأصعب من إنك تكون يتيم إن أهلك يتجاهلوك أو يسيئوا ليك الأصعب من الفشل عدم المحاولة من الأصل الأصعب من اليأس الخذلان وخيبة الأمل الأصعب من الألم إنك تتوجع في صمت الأصعب من الموت إنك تعيش حياتك غصب الأصعب من الإلحاد إنك تُعبد إله مشوه لا انت قادر ترمي طوبته ولا تصدق إنه مُحب الأصعب من أصعب شيء إنك تكون واقف في النص لا انت طايل سما ولا حتى طايل أرض وتفضل طول عمرك عامل زي اللي رقصوا ع السلم مزنوق في حتة ضيقة لا انت برة ولا جوة وتبان وكإنك بتاخد بس انت مابتاخدش ويحسبوك عايش وانت من جوة ميت وكل أمَلك تموت يا تعيش الحياة بنِفس. ماري منير 6/12/2013