اللي مالوش كبير هو الكبير!

الإحتياج لكبير إحتياج مهم قوي، لأن الكبير يعني قدوة، الكبير يعني سند وضهر وأمان، وحاجات تانية كتير بنحتاجها خصوصاً في مراحل نمونا الأولى، بس للأسف مش دايماً بيبقى فيه كبير، ولو كان موجود ممكن يبقى مسيء أو حتى زي قلته، وتأثير ده علينا بيبقى في أحيان كتير مُدمر، وممكن يسبب تشوهات نفضل طول عمرنا بنحاول نعالجها.

وبيقولوا في الأمثال: "اللي مالوش كبير ... بيشتريله كبير" بس حتى ده ممكن يكون صعب إننا نلاقيه، لأنه مش سهل إننا نلاقي كبير متاح ويملا عينّا، وكتير مننا لما حس إنه أخيراً لاقاه، في الأخر إكتشف إنه الكبير ده ماطلعش كبير، وإنه ممكن يكون هو نفسه أكبر من اللي كان فاكره كبير!

ممكن تحسوا إن أنا تشاؤمية.. لكن في الحقيقة أنا واقعية، ومابحبش أكتب أي كلمة غير لما تكون نابعة من خبرتي وخبرة ناس كتير أعرفهم، وبما إن اللي بقوله ممكن يكون بيعبر عن واقع ناس كتير لسة بيدوروا على كبير ومش لاقيين، أو حتى فقدوا الأمل وإستسلموا بعد ما إتعرضوا لخذلان وإساءات كتير، فأنا عايزة أوجه كلامي للناس دول:

لو إنت ماكانش عندك كبير وإنت صغير، وفضلت بقية عمرك عمال بتدور عليه على أمل إنك تلاقيه...

لو إنت إتعرضت لإساءات كتير من الناس المفروض يكونوا بيراعوك ويحموك...

لو إنت جواك جوع كبير وعدم أمان، ومافيش حد أو حاجة قادرين إنهم يملوك...

لو إنت إتبهدلت وإتمرمطت أثناء بحثك، ومحاولات إنك تشبع الجوع...

لو إنت شخص مميز ومافيش منك نسخ، وده خلاك مش قادر تحس بالإنتماء لأي مجتمع، لأنك مش قادر تمشي ورا قطيع...

لو إنت حد موهوب جداً، ومش لاقي اللي يديك فرصة ويصدق فيك...

لكل دول أنا عايزة أقول:

ماتستناش تلاقي كبير.. 

وكون إنت الكبير.

ماتستناش إنك تلاقي طريق مُمهد يوصلك للمكان المناسب ليك، لكن إحفر إنت طريق جديد، وساعتها ناس كتير ممكن يمشوا ع الطريق اللي إنت حفرته بإيديك.

ماتستناش حد يؤمن بيك وبمواهبك، لكن صدق إنت في نفسك، لأن ربنا بنفسه معاك، وهو أكتر واحد مصدق فيك، هو كبيرك الحقيقي اللي ممكن يشبع جوعك. صحيح هو هيستخدم برضه ناس عشان يوصلولك حبه وإعتنائه بيك، لكن ساعتها مش هتكون ماسك فيهم هما، وحياتك مش هتبقى واقفة عليهم، وعلى اللي بيمنوا بيه عليك، وهو كمان ممكن يساعدك عشان تكون إنت الكبير لناس كتير محتاجين، لأنك هتكون إتمليت من مصدر الحب الحقيقي، وقادر تدي وتفيض.

ماري منير

31/10/2014