رحلة التغيير

رحلة التغيير مسيرة صعبة قوي وشاقة وبتحتاج وقت طويل، بس في نفس الوقت ليها جمالها وإنتصارتها اللي بتحسسنا إن اللي عملناه يستاهل، وخصوصاً في الأوقات اللي بنجني فيها ثمر تعبنا في شيء، وفي الوقت ده إحنا محتاجين نحتفل بروحنا ومانقللش من قيمة اللي وصلنا ليه.

بس أكتر مشكلة بتواجهنا في الرحلة دي، هي الأوقات الصعبة اللي بنتعرض فيها لضغوط وتحديات، أو إحباطات وانتكاسات و فشل بعد مجهود كبير، وعشان نقدر نتعامل مع الضغوط دي محتاجين حاجات كتير، منها مساعدة من قوة أعظم مننا، و شغل على طريقة التفكير اللي ممكن تكون مخليانا مشلولين.

ومن الحاجات اللي ممكن تكون بتصعب علينا الأوقات دي، هي التوقعات الغير واقعية، زي مثلاً التوقع إن الطريق ده مُمهد ومافيهوش مطبات أو إنتكاسات كتير، فمع أول مطب يعترض طريقنا أو إنتكاسة ننهار ونحس إننا مش قادرين نكمل، وكإن اللي حصل ده شيء مش وارد، مع إنه أمر طبيعي جداً وبيأكدلنا إننا ع الطريق الصحيح.

وكمان طريقة تقييمنا للنجاح والفشل ممكن تأثر علينا وتحبطنا، زي مثلاً لو أخدت خطوات كتير وبعدين رجعت خطوة أو خطوتين، مش بشوف إني كده برضه مشيت جزء من الطريق، وحتى لو رجعت لأوله فأنا في الحقيقة مش برجع بنفس الشكل اللي بدأت بيه، لأن بيبقى عندي خبرة وأدوات تساعدني أعملها المرة دي أحسن، وبقيت واعي أكتر للمشاكل اللي ممكن تقابلني وبعمل حسابها، وكمان ببقى شايف أكتر نقط ضعفي اللي ممكن تخليني أنتكس، عشان أحاول أركز وأشتغل عليها فماقعش في نفس الحاجات، ولو حتى وقعت الموضوع بيكون بمثابة تدريب.

وفي حاجة تانية ممكن تخلينا نحبط، وهي إننا نكون مش قادرين نقيس مدى تحسنّا ونشوف التقدم اللي وصلنا ليه، يعني مثلاً لو كنت شخص سلبي ومش بعرف أحط حدود أو أأكد على حقي، ممكن أول ما أبدأ أخد رد فعل وأحمي نفسي إني أكون عنيف، أو أخد رد فعل متأخر، أو ماعملش ده بقوة قوي وأتراجع عن موقفي بدل مفضل مُصر عليه، بس الطبيعي في أي مهارة بتعلمها إني ماكونش في الأول ظابطها قوي أو سريع، وممكن أكون مهزوز وأنا بعملها من كتر خوفي أو صعوبتها عليا، وخصوصاً إن ده شيء بالنسبالي جديد، وأكيد هحتاج وقت ومجهود ومثابرة عشان أتقن المهارة دي بشكل كبير.

ولأنه صعب عليا أعمل كل ده لوحدي، فأنا محتاج ناس تساندني في رحلة التغيير، ويشجعوني في الأوقات اللي أنا بأحبط وأستسلم فيها، عشان أقف تاني على رجلي وأكمل الطريق، وأكيد أنا محتاج وجود ربنا جنبي وقوته في اللي أنا عاجز فيه، وبرغم إن الطريق صعب ومؤلم.. بس يستاهل إننا نمشي فيه، عشان نتغير ونواجه عيوبنا، ونعيش الحياة بشرف.. مش وإحنا هربانين.

دعاء السكينة

 ماري منير

26/10/2014