السهل الممتنع

أنا مش من السهل إن حد يبهرني، وعشان كده الأشخاص اللي كانوا مبهورين بالنسبالي مايتعدوش واحد أو أتنين، واللي بيشدني في الناس الصفات دي: إن أفكارهم تكون عميقة وأصلية، وفي نفس الوقت تكون واقعية وعملية، وكمان بيفرق معايا قوي الصدق والشفافية، وإن يكون البني آدم حساس وبيقدر مشاعر الناس وعجزهم.

وعشت سنين بتمنى أصاحب الناس النادرة اللي من النوعية دي، لحد ما الحلم إتحقق وفعلاً جمعتني صداقة عميقة بحد فيه الصفات دي، بس للأسف الحلم طلع كابوس وإكتشفت إن الأفكار مهما كانت عظيمة مالهاش أي مكان في العلاقات القريبة، وإن الشخصية بمميزاتها وعيوبها وطريقة تفاعلها وردود أفعلها، أهم بكتيرمن الأفكار دي، لأن مهما كانت الأفكار اللي مؤمنة بيها مبهرة ، في الأخر اللي هيتحكم في علاقتي هي أفكاري التلقائية، مش أفكاري العظيمة الواعية، وأفكاري التلقائية دي هتأثر على مشاعري وسلوكي وفعلي ورد فعلي.

وعشان كده إحنا ممكن ننبهر بناس أفكارهم ملهمة ومؤثرة، وفي الغالب كتير مننا بيتمنى إنه يكون قريب منهم، وممكن فعلاً لو إتعاملنا معاهم نحس إنهم مبهورين حتى ع المستوى الشخصي، بس لو دخلنا معاهم في علاقة حميمة، هنقدر نشوفهم بشكل أعمق م اللي هما حتى عارفينه عن نفسهم، لأن ساعتها هتبان التناقضات الناتجة عن صراعهم مع المفروض والموجود، ومع إرادتهم وعجزهم، ومهما كان قبولنا وإحترامنا وتقديرنا لإنسانيتهم، ممكن برضه مانقدرش نتحمل نكون قريبين قوي منهم، وكل واحد بقى على قد طاقه إحتماله وتفهمه.

وزمان كان الناس اللي ممكن يكونوا مبهرين بالنسبالنا هما الناس المشهورة أو المحطوطين تحت الأضواء بأي شكل، بس نتيجة لإنتشار مواقع التواصل الإجتماعي، بقى فيه فرصة قدام كل الناس إنهم يعبروا عن أفكارهم ونفسهم، ويوصلوا صوتهم لعدد كبير من البشر، وعلى قد ما تكون قادر تكتب وتعبر عن مشاعرك وأفكارك بشكل متميز، على قد ما هتلاقي جمهور بيعجب بيك وبيتابعك، بس مهما كانت الهيصة حواليك كتير، مش هينفعك في الأخر غير القريب منك وعارف كل عيوبك ومستحملك، ويا تعيش الدور وتكون نجم بعيد لو حد طاله يتحرق، يا تشتغل على نفسك وتكون السهل الممتنع، وساعتها ممكن تلاقي اللي يفك شفرتك وبرغم عيوبك يقدرك.

 

ماري منير

21/7/2014