الخوف هو العدو

أنا فضلت بتابع مسلسل "تحت السيطرة" لمدة شهر كامل على أساس إنه بيدور حوالين الإدمان، وبالذات الهيروين تحديداً. وبرغم إنه خلاني أحس بمعاناة المدمن وأسرته حتى بعد التبطيل، بس ماكانش فيه حاجة بتخص مشاكلي، لغاية ما "مريم" فاجئتني في أخر حلقة لما اتكلمت بتركيز أكتر عن خوفها، وساعتها بس حاسيت بالونس، لأني أدركت إنها بتصارع مع نفس المشكلة اللي عندي.

أنا طول عمري بعاني بسبب الخوف، وعمري ما قدرت أتخلص منه. صحيح طريقة تعاملي معاه بتتحسن كل ما بشتغل عليه، لكن الخوف فضل ملازمني، وحتى لو ربنا قدرني إني أعمل الحاجة اللي خايفة منها، الخوف بيفقدني استمتاعي بيها، لأن الخوف مش بس ليه تأثير على مستوى الأفكار والمشاعر، لكن كمان ليه أعراض جسدية، والأعراض دي بتكون مؤلمة جداً، ولو الخوف زاد قوي ممكن كمان يؤدي للموت.

والخوف ممكن يكون مُعجز جداً، لأن فيه حاجات كتير أنا مش بقدر أعملها بسبب خوفي، ولو حتى قدرت أعملها بعد صراع طويل، بيكون ده بطلوع الروح، في حين إن غيري ممكن يعملها بسهولة قوي، وده بيخليني أتحسر قوي على نفسي كل ما باحس إن الناس القريبين مني عايشين، وأنا مدفونة بالحيا. 

أنا عارفة إن كل إنسان وعنده معاناته، بس برضه حاسة بفرق بين واحد بيعاني في حياته، وبين واحد أصلاً مش عايش، لأن الخوف ممكن يشل الإنسان، ويخلي عنده إعاقة بتمنعه إنه يعيش حياته بشكل طبيعي، وبيستنزف كمان طاقته وبيفقده الدافعية للحياة، والخوف لسنين طويلة بيجيب اكتئاب.

والخوف هو السبب كمان ورا الوسواس القهري، والصورة المعروفة ليه هو وسواس النضافة، وده وراه خوف من المرض أو الموت، بس ممكن الوسواس ده يكون ليه علاقة بأي فكرة تانية بتسيطر على الإنسان، وبتخليه يعمل حاجات معينة بشكل قهري، وده بيعمله إعاقة.

ده غير إن الخوف مرتبط كمان بالعنف والغضب، لأن الخوف ممكن يخلي الإنسان رد فعله عنيف من كتر توتره وقلقه.

والخوف كمان ممكن يكون ليه علاقة بالاعتمادية، لأن الإنسان بسبب خوفه ممكن يستخبى ورا أشخاص، عشان هو مش قادر يواجه ويتعامل مع الحياة. وممكن كمان يخلي الإنسان متردد، ومش قادر ياخد قرارات لوحده من غير ما يرجع لناس تساعده إنه يحسمها، من كتر ما هو خايف يغامر ويجرب. وحتى لو الإنسان قدر ياخد قرار شجاع ويعمل حاجة هو خايف منها، ممكن يحس إنه محتاج ناس طول الوقت تسانده وهو بيواجه الحاجة دي، وطول ما هو خايف بيحتاج ناس جنبه تطمنه. وممكن ده يخليه يلجأ للسيطرة على الناس عشان مايبعدوش عنه، أو حتى يروح ناحية الاستقلالية عشان مايحسش إنه حياته واقفة عليهم. 

ده غير محاولات السيطرة على الظروف عشان مفيش حاجة تفاجئه، أو حتى ممكن يحاول يسيطر على صورته وشكله قدام الناس، فممكن مثلاً يلبس قناع ومايكونش على طبيعته، أو ينسحب خالص ويستخبى، أو يروح ناحية الكمالية ويبقى مش سامح لنفسه إنه يغلط، عشان خايف من التقييم أو الرفض.

والخوف مش بس ممكن يخليك تعتمد بزيادة على الناس، لكن ممكن كمان يخليك تلجأ للمخدرات، عشان تهرب من خوفك زي ما عملت "مريم". وأصلاً كلنا بنعاني من إدمانات، سواء كان ليها علاقة بمواد (زي الخمور  والمخدرات) أو إدمان علاقات (إدمان البشر) أو إدمان سلوكي (زي إدمان الأكل أو الجنس). والخوف هو مصدر كل الإدمانات باختلاف أنواعها، وعشان كده الخوف هو العدو الحقيقي اللي لازم نتعامل معاه ونواجهه.

وفي النهاية أنا حبة أختم بالكلام اللي قالته مريم: "الخوف.. الخوف هو اللي لازم أفضل أحاربه لغاية ما أهزمه. خوفي بيشلني.. بيقيدني، وأنا عايزة أبقى حرة، عايزة أبقى حرة عشان أعرف أحارب ضعفي، وعشان "فريدة" ماتكبرش وتلاقي مامتها الخوف قاتلها. أنا هقتل خوفي عشان أعرف أعيش الحياة اللي أنا أستحق أعيشها". تحية لكل بني آدم حقيقي، بيصارع بشرف مع خوفه زي "مريم".

ماري منير

19/7/2015