قوة الألم

مفيش إنسان طبيعي بيحب إنه يتألم، بس الألم دوره إنه ينبهنا إن فيه حاجة غلط محتاجين نعالجها أو نبعد عنها، وبيبقى عندنا إستعداد إننا نعمل أي حاجة عشان نتحاشى أي ألم، بس لما يكون الألم بيتعارض مع شيء فيه لذة أو سلوك قهري بنعمله، أو حاجة اتعودنا عليها أو اتعلقنا بيها، أو حتى كان شيء بيسدد احتياج عميق عندنا، ساعتها بيبقى صعب علينا إننا نبعد عنه، ولازم يكون الألم الناتج عن الشيء ده أكبر من ألم التخلي عنه عشان نقدر نسيبه.

يعني مثلاً ممكن يكون فيه علاقات في حياتنا مؤذية جداً، بس من كتر ما إحنا مش عايزين أو مش قادرين نسيبها، بنكمل فيها برغم خساير وجودها في حياتنا، والأمل الوحيد اللي ممكن يخلينا نقطعها، هو إننا نبقى واصلين لدرجة من الألم غير محتملة، لأن ده اللي ممكن يزنقنا ويخلينا غصباً عننا نقبل إننا نفقدها، وأنا عن نفسي أضطريت أفقد علاقات كنت ماسكة فيها قوي، بس لما الألم لوى دراعي، غصباً عندي فتحت إيدي وسيبتها من كتر شدة الوجع.

وفيه حاجات تانية كتير ممكن نكون ماسكين فيها برغم ضررها، وده مش بس بينطبق ع الحاجات اللي فيها سلوك قهري أو إدمان، أو حتى تعلق أو تعود، لكن ممكن ده يشمل كمان مخاوفنا، فأحياناً وجود خوف أكبر من الحاجة اللي خايفين منها، ممكن يساعدنا نقرر نتحمل ألم مواجهة خوفنا، زي مثلاً الخوف من الموت، ممكن يخلينا نوافق نعمل عملية بالنسبالنا مخيفة قوي.

أنا مثلاً بخاف من التقييم، وده عملي مشكلة مع الامتحانات الشفوي أيام الكلية، وبسبب خوفي ده أنا وقفت قدام الدكتور من غير ما أقدر حتى أنطق بكلمة، وكانت طبعاً نتيجة ده إني سقطت في المادة دي، وكان لازم أعمل حاجة تساعدني أتعامل مع خوفي عشان أقدر أنجح وأتخرج، وفي سبيل إني أحصل ع المساعدة دي اضطريت أعمل حاجات في حد ذاتها كانت مخيفة بالنسبة ليا، بس خوفي من الفشل وإني ماقدرش أتخرج، خلاني أعمل حاجات تانية بخاف منها، فكان الشيء اللي زنقني إني أواجه خوفي، كان في الحقيقة خوف تاني أكبر.

وعشان كده أنا شايفة إن الألم ليه قوة، والقوة دي ممكن تزنقنا إننا نتغير، أو نبطل حاجات ليها خساير ومضرة، أو نواجه مخاوف بتشلنا وتعجزنا، أو حتى تخلينا نغامر ونجرب إننا نعمل حاجات في العادي مستحيل إننا نعملها.

وبرغم صعوبة وغلاسة الألم، بس إحنا اللي في إيدينا نحدد شكل ومدى تأثيره علينا، ويا نستسلم ونعيش دور الضحية، وساعتها الألم هيكون أصعب وملهوش أي لازمة، يا نستغله ونستخدمه عشان يكون دافع بيقودنا لشيء أفضل.

ماري منير

1/1/2015