احتياج إنك تتشاف

أهم حاجة في العلاقات العميقة، إنك تحس فيها إنك متشاف، ومتشاف يعني الآخر مهتم بيك اهتمام حقيقي، وموجود بجد مش بيقول كلام يبان إنه بيعنيه بس مفيش تصرفات في الواقع بتعكس اللي بيقوله، ولما بتشاركه وجعك بيحس بيك وبيقدر مشاعرك، ويا سلام كمان لو بيقدر يحط نفسه مكانك ويشوف الدنيا بعنيك إنت، وهو ده بقى في نظري شوفان الآخر في أعمق صوره.

بس لو إنت مش متشاف في أي علاقة، هتلاقي اللي قدامك مش بيديك عطاء حقيقي، ومش بيحاسب عليك ولا بيعمل حساب لمصلحتك، ومش بيقدر مشاعرك وتعبيرك عن وجعك ومخاوفك، وهتلاقيه مركز قوي على نفسه واحتياجاته ومشاكله لدرجة بتستنفزك، وكإنه بيقولك بشكل غير مباشر إنه هو أهم منك.

وفيه ناس بيبقوا بطبيعتهم أنانين، أو عندهم إدمانات بتخليهم مدفوعين بشكل قهري إنهم يسددوا احتياجهم حتى لو هيأذوا ويستغلوا غيرهم، وده بيخليهم يستخدموا أي حد في سبيل إنهم يحصلوا على أي شيء يهدي جوعهم أو يسكن وجعهم.

وفيه ناس تانية نوع إدمانهم مابيخليهمش يستغلوا أو يأذوا الآخرين، بس ممكن يكون عندهم مشكلة في مهارات التواصل العميق، زي المواجدة اللي بتحتاج إنهم يخرجوا برة نفسهم ويشوفوا الدنيا من منظور الآخر، أو إنهم على أقل تقدير يكون عندهم مهارة التعامل مع المشاعر وتقديرها، وعدم الرد عليها بالعقل أو بالمنطق، وفي نفس الوقت يقدروا يتفاعلوا مع المشاعر المؤلمة بشكل يهدي حدتها ويهون تأثيرها ع الشخص اللي بيعاني من وطئتها.

بس النوعين اللي ذكرتهم دول هيكون عندهم صعوبة شديدة إنهم يشوفوا الآخر، لأن الموضوع لو متعلق بإدمان هيكون الشخص محصور في نفسه وفاقد السيطرة وعاجز، وساعتها مش هيكون قدامنا غير إننا ناخد إجراءات تحمينا من استغلالهم وتعديهم على حدودنا، وده بيتضمن إننا ممكن لو تطلب الأمر نبعد خالص لو كان ده شيء متاح بالنسبالنا. ولو كانت مشكلتهم بسبب نقص في مهارات التفاعل، فساعتها مش هنقدر نشاركهم بحاجات عميقة، إلا لو اتدربوا واشتغلوا على روحهم، عشان يكونوا قادرين يتعاملوا مع مشاعرنا بشكل أفضل.

أما بقى الناس اللي بيقدروا يعملوا ده من الأول، لكن مابقوش متاحين لأن طَرق في حياتهم أمور بقت شغلاهم، أو جدت حاجات خليتهم يفقدوا اهتمامهم، وبقوا ملهيين عننا لدرجة خليتهم مش شايفنا، فدول برضه معرضين إننا نفقدهم لو الوضع ده استمر لفترة طويلة، بس ساعتها الفقد ممكن يكون أصعب علينا، خصوصاً بعد ما تعودنا علي تسديدهم لاحتياجاتنا بشكل يصعب تعويضه، لأن الناس اللي بيمتلكوا المهارات دي نادرين جداً، حتى في مجال العلاج النفسي والمشورة. بس سواء الشخص ده كان معانا وفقدناه، أو حتى عمرنا ملاقيناه، فماقدمناش للأسف غير إننا نقبل ده، ونعيش على أمل إننا في يوم نلاقي حد نحس إنه شايفنا، وبيجيد التعامل مع لغة المشاعر.

ماري منير

19/2/2015