الصدمة

الصدمة بتحصل لما بنتعرض لأي خبرة أو إساءة ممكن تكون فوق طاقة احتمالنا، وبيبقى صعب علينا إننا نستوعبها أو نصدقها. حتى لو كان جوانا توقع أو شك قبلها، برضه لحظة مواجهة الحقيقة بتبقى صعبة قوي ومؤلمة لدرجة ممكن تخلينا نتعامل معاها بالإنكار، زي مثلاً لما بنفقد حد قريب قوي مننا، وخصوصاً لو فقدناه عن طريق الموت، بنبقى في الأول مش مستوعبين، حتى لو كان مريض قبلها وحالته متدهورة قوي، بس لما بيموت برضه الموضوع بيبقى مُصدم، وبيبقى صعب علينا نصدق ده، حتى لو عدى وقت ممكن نحس إنه مسافر أو لسة في المستشفى، وأكيد في يوم هيرجع ويبقى تاني موجود.

وده مش بس بيحصل مع الفقد، لكن كمان لو اكتشفنا حقيقة شخص كان فارق معانا قوي، أو ليه وضع ومكانة كبيرة في عنيننا أو في المجتمع، وبتبقى الصدمة صعبة على قد توقعنا منه، وكمان على قد الفعل اللي هو عمله، وخصوصاً لو كان فعل مُشين، زي مثلاً إننا نكتشف إنه بيستغل الناس في تسديد احتياجاته المريضة وسلوكياته القهرية، فممكن يكون بيعلقهم عاطفياً، أو حتى يستغلوهم جنسياً ويدمرهم على كل المستويات.

والصدمة كمان بتبقى أصعب لما نكون إحنا اللي اتعرضنا للإيذاء، وخصوصاً بقى لو كان ده من شخص هو المفروض يكون بيحميني أو بيساعدني، لأن الثقة فيه بتبقى كبيرة قوي، زي مثلاً لو كان حد كبير في عيلتي، أو رجال الدين والدكاترة اللي الناس بتلجألهم عشان يخدوا بإيدهم، بس للأسف أحياناً ممكن يستغلوهم ويغرقوهم أكتر.

أنا عارفة إن الأمثلة اللي ذكرتها دي صعبة قوي، بس مش شرط إننا نكون اتعرضنا لصدمات كبيرة زي دي، لأن ممكن نكون اتعرضنا لحاجات بسيطة بس كانت بمثابة صدمة بالنسبالنا، وممكن ده مايكونش بيتعلق بأشخاص نعرفهم بس، لكن ممكن كمان نتصدم في روحنا، ونكتشف حاجات في نفسنا ماكناش واعيين ليها.

وأياً كانت الصدمة اللي إنت ممكن تكون مريت بيها ولسة بتعاني من آثارها، فأنا نفسي إنك ماتفضلش تهرب من مواجهتها، عشان مهماً كان حجم الوجع، فده وجع صحي بيشفي، ولو ماحستهوش جرحك مش هيخف، لكن هيفضل ملوث والصديد فيه مش هيجف، وعشان كده لازم تفتحه وتنضفه، بدل ما تفضل ميت مش بتحس.

ماري منير

4/1/2015