التعافي من وجهة نظري

في بداية سكة التعافي ووعينا بنفسنا، بنبقى مولعين قوي بالمعلومات، وأي كلام بيساعدنا إننا نفهم مشاكلنا أكتر والأسباب اللي وراها، وبنبقى عاملين زي الأعمى اللي كان عايش طول عمره في الضلمة، وفجأة النور نور.. فشاف وأدرك حاجات لأول مرة في حياته. 

بس الشوفان والوعي ده مش بيهَدينا، لكن بالعكس ممكن يخلينا بنسعى إننا نعرف ونفهم أكتر، لأننا لما بنشوف بنتزق إننا نلاقي حل، وكل تفكيرنا بينحصر في إزاي هنتخلص من العيوب والمشاكل اللي شوفناها، وممكن نبقى عاملين زي الغريق اللي عمال يتعلق بقشاية، فنسمع وندور ونقرا بنَهم، لأن عندنا أمل إننا نلاقي الحل، ولما مانلاقيش أي حلول، أو حتى نلاقي بس مانقدرش نعمل اللي المفروض يتعمل، بنبقى محبطين فترة، بس بعد شوية بنقوم تاني ونجري نسمع أو نقرا أكتر، وكإن المرة دي خلاص هنوصل للي بندور عليه، وممكن نفضل نضيع عمرنا كله وإحنا بنجري ورا سراب، وعندنا أمل إن المرة اللي جاية هتصيب، بس للأسف عمرنا ما هنلاقي الحل اللي بندور عليه!

أنا عارفة إن ممكن تتخيلوا إن اللي بقوله ده نوع من التشاؤم، وممكن ناس تتساءل إنتي بتسوديها في وشنا ليه، وطبعاً ده مش قصدي ولا أكيد ده هدفي من المقال، أنا بس كل اللي فارقلي أوفر عليكم الوقت والمجهود اللي ممكن تضيعوه في السعي ورا حل مالوش أي وجود. أيوة أنا بجيبلك من الأخر وبقولك مفيش حل، لأن التعافي مش زرار. التعافي مش حلول جاهزة لو عرفتها هتتغير وتأثير اللي حصل هيتمحي. التعافي مش مجرد قرار بتاخده في لحظة صحوة ومواجهة حقيقية مع نفسك، وبعدها تفضل تلوم روحك لما تلاقيك زي ما إنت، ومزنوق وبتصارع في نفس الحتت، وعمال كل شوية بتنتكس وتوقع.

طيب أومال التعافي هو إيه؟!

التعافي من وجهة نظري هو سكة بتحاول فيها تكون إنسان بكل معنى الكلمة.

وإنسان يعني عندك عيوب. 

إنسان يعني بتغلط وبتوقع. 

إنسان يعني محدود. 

إنسان يعني عندك احتياجات، وماتقدرش تعيش من غير ناس يسددوهالك، وبتقدر تاخد من غير ما تكون بتعتمد ع الناس بزيادة لدرجة تضرك أو تضرهم. 

إنسان يعني بتتأثر. 

إنسان يعني بتتوجع. 

إنسان يعني بتعافر وبتصارع مع عيوبك بشرف. 

إنسان يعني حقيقي وشفاف، ومابتحاولش تعمل فيها خبير برغم كل المعلومات اللي عرفتها، وكإنك الشخص الوحيد اللي متظبط على الكورة الأرضية! 

إنسان يعني زيك زي أي إنسان تاني، بيصارع هو كمان ومحتاج مساعدتك.

إنسان يعني أنا وإنت لما نشارك بعض بصراعنا.. نحس بونس. 

إنسان يعني أحس بيك وتحس بيا. 

إنسان يعني الإنسانية.

وزي ما أنا شايفة إن التغيير صعب، فالقبول بالنسبالي شيء أصعب، لأن القبول ده أنا سمعت برضه كتير عنه، وماقدرتش عمري أوصله، وإذا كان التعافي سكة، فالقبول هو كمان مش زرار، ومهما ناس حبوني وأنا كبير، ممكن ده مايساعدنيش إني أحب وأقبل نفسي، لو أنا مش عارف أصدق وأستقبل وشايف إني ماستحقش، أو مش قادر أطمن إن الحب والقبول ده مش هيروح في يوم مني.

طيب هل معنى كلامي إن مفيش حد اتغير وتخلص من العيوب اللي كان بيعاني منها، أو إن مفيش حد قدر يقبل نفسه بعد ما كان بيجلدها ومش راحمها؟ أكيد برضة لأ، لأن ممكن يكون فيه ناس قدروا يوصلوا لده برغم صعوبته، والناس دي أنا بهنيهم، وبقولهم المقال ده مش ليكم، لكن أنا بوجه كلامي للناس اللي بقالهم سنين بيشتغلوا على نفسهم، ولسة بيصارعوا مع نفس العيوب والمشاكل، ولا قدروا يتغيروا ولا حتى يقبلوا نفسهم زيي.

بس برغم إني ماقدرتش أقبلني، لكن على الأقل أنا مواجهة نفسي بحقيقة إني هفضل أصارع بشرف مع عيوبي لحد ما أموت، وبحاول أقبل وأتعايش مع الحقيقة دي. صحيح هي صعبة ومؤلمة قوي، وبقولها وأنا دموعي بتنزل، بس ده أرحملي من إني أفضل عايشة وأنا مستنية وهم عمره ما هيحصل!

أنا مدركة إن دي نهاية مأساوية لمقالي، بس أنا شايفاها الحقيقة الأكثر واقعية، وده مش معناه إني هبطل أصارع أو هستسلم، لكن أنا ماقدميش غير إني أستخدم ألمي ومعاناتي في مساندة ناس بيعانوا زيي، وكفاية إن كل اللي اختبرته خلاني أقدر أحس بألمهم، وأقدّر حتى المشاعر اللي مش قادرين يعبروا عنها، وده هو التعافي في نظري: إنك تحول معاناتك لشيء نافع ومُلهم.

ماري منير

31/5/2015