التجربة الفاشلة أفضل من عدم المحاولة

أنا حد متردد وبخاف أجرب أي شيء جديد، بس مؤخراً ابتديت أخد خطوات عكس خوفي، وبقيت بنتهز الفرص اللي بتتحط قدامي برغم خوفي إني أندم، أو أورط نفسي في حاجة تطلع مش مناسباني بعد ما أجربها. ولغاية دلوقتي بصراحة النتيجة مش كويسة، لأن كل اللي جربته بعد القرار ده طلع فعلاً مش مناسب ليا، أو كان كمان فيه ضرر عليا، وفي الأول طبعاً ندمت وقولت ياريتني ما كنت عملت كده، بس بعد تفكير وتأمل، شوفت إن التجربة الفاشلة أفضل من عدم المحاولة.

أنا قبل ما أخاطر كنت باصارع، وحاسة إني ممكن أكون باضيع فرص، وكنت حاسة إني كمان جبانة عشان مش باغامر وأجرب، وكنت عايشة هربانة ومُحاصرة بمخاوفي، وبعد ما الفرصة تضيع بفضل ألوم نفسي. 

بس بعد ما قررت أجرب، تأكدت إني مش بضيع فرص ولا حاجة، وحسمت صراعي وواجهت مخاوفي. صحيح الانسحاب بيبقى صعب بعد ما أكون بدأت، وممكن يكن فيه خساير عليَّ وعلى غيري، بس خساير إني أكون ضيعت فرصة حقيقية أكبر، وحتى مجرد احتمالية إن ممكن أكون ضيعت فرصة تستاهل كان هيفضل معذبني، لكن أنا دلوقت لما بابص ورايا ببقى راضية عن نفسي، وحاسة إني جربت وعملت اللي عليَّ، ومازقتش الحاجة قبل ما أعرف اللي فيها.

أنا طبعاً باحس بالإحباط لأن المحاولة فشلت، وباخد وقت في الأول باصارع فيه مع إحساسي بالذنب تجاه الحاجات اللي بدأتها وسيبتها، والناس اللي عرفتها وبعدت عنها، عشان ممكن يكون ده ليه خسايره كمان عليهم. بس في نفس الوقت باحاول أفكر نفسي بحقوقي: 

من حقي أسيب أي حاجة بدأتها واكتشفت إنها مش هتفيدني أو مش مناسبه ليَّ.

ومن حقي أبعد عن أي علاقة أنا مش مرتاحالها أو فيها ضرر عليَّ.

ومن حقي أرفض أي حاجة أنا مش عايزاها، حتى لو رفضي ده هيوجع شخص بيحاول يقرب، وبرغم إني بحاسب قوي على مشاعر غيري، بس ماينفعش أعمل ده على جثتي.

هي فعلاً معضلة صعبة بالنسبالي، بس أنا لو حاسبت ع الناس بزيادة لدرجة إني أضر نفسي، يبقى كده أنا بدمرني.

 ماري منير

29/1/2015