العلاقات بين الجنسين

العلاقات العميقة بين الجنسين من العلاقات اللي فيها خطورة، لأن من المحتمل إن يحصل فيها عك كتير تحت مسمى الحب أو الصداقة، والحقيقة إن مفيش حد في مأمن من التورط العاطفي مهما كانت مكانته أو نضوجه، وحتى لو كان متزوج وسعيد مع شريك حياته. بس زمان كنت متخيلة إن علاقات الصداقة مع شخص متزوج ممكن تكون أقل خطورة من العلاقات بين اتنين عزاب، لأن غير المتزوجين فيه احتمال إن الموضوع يتطور بينهم ويبقى فيه مشاعر بتؤدي للارتباط، لكن بالنسبة للمتزوجين المفروض ده مايحصلش، لأن فكرة الارتباط دي مش واردة أساساً.

وبرغم إن المفروض مايكونش فيه تورط عاطفي بين أي اتنين مش هيرتبطوا، بس للأسف اللي بيحصل في الواقع عكس كده تماماً، والموضوع مش بس بيوقف عند التورط العاطفي، لكن ممكن كمان يوصل لتورط جنسي، حتى في أكتر العلاقات اللي المفروض تكون بعيدة عن كده تماماً، زي العلاقات الرعوية بين رجال الدين والمخدومين، وحتى العلاقات العلاجية بين المعالج والشخص اللي طالب مساعدة!

ومن الأسباب اللي بتؤدي لده: الجوع الشديد للحب، ولحاجات تانية كتير ممكن يكون بيسددها الجنس الآخر، زي الرعاية والإهتمام، والأمان والحنان، والإعجاب والتشجيع والكلام الحلو، وحتى الاحتياج الجنسي اللي ممكن يكون بيضغط على ناس كتير خصوصاً الرجالة، وممكن كمان الاحتياج لكل الحاجات دي ياخد شكل مرضي و يوصل للإدمان، وده بيخلي الشخص مدفوع بشكل قهري لعمل علاقات عاطفية أو جنسية خارج إطار الزواج.

وبرغم إني كنت شايفة إن فكرة عدم وجود صداقة بين الجنسين وخصوصاً في السن الكبير ده نوع من التعقيد، وكان عندي اعتقاد إن الواحد لو كان عنده وعي بنفسه وبيحط حدود، فده ممكن يحمي العلاقة من إنها تخرج برة إطار الصداقة، بس للأسف خبرتي وخبرة ناس كتير أعرفهم أثبتت عكس كده تماماً، لأن فيه ناس ممكن تستغلنا بشكل خبيث ويلخبط، وده ممكن يخلينا نعدي أو نستى لغاية لما نتأكد والأمور تبقى أوضح، بس ساعتها ممكن نكون اتعلقنا، وفي الحالة دي قرار البعد عنهم بيكون جاي متأخر وأصعب، وأكيد خسايره هتكون أكبر.

والشيء اللي ممكن يكون بيوصل الأمور لكده، إن يكون عندنا إحتياج غير مسدد، أو إعتمادية في العلاقات بتخلينا مانحطتش حدود واضحة وصارمة، أو تكون المشكلة دي عند الطرف الآخر، وده هيخليه فاقد السيطرة على روحه، خصوصاُ لو الموضوع واصل عنده للإدمان، وساعتها مش هيكون قادر يلتزم بحدودنا حتى لو نهينا العلاقة، وممكن الشخص ده يفضل يطاردنا برغم كل محاولات توقيفه، وطبعاً الموضوع هيكون أصعب لو الطرفين عندهم نفس المشكلة، لأنهم مش هيكونوا قادرين أصلاً يحطوا حدود، ولا حتى يبعدوا مهما كانت العلاقة مؤذية ومريضة، ولو ربنا كرم طرف فيهم على الأقل وقدر ياخد القرار ده، ممكن برضه يرجعوا لبعض تاني، أو يعملوا علاقة تانية مريضة بنفس الشكل.

وفي النهاية يبقى السؤال المحير: هل نقفل على نفسنا ومانعملش علاقات صداقة مع الجنس الآخر، ولا نحاول نعمل كده بحدود برغم خطورة إننا ممكن برضه نتعلق؟ أنا طبعاً ماقدرش أجاوب ع السؤال ده بدالك، بس أنا عن نفسي خلاص حسمت الموضوع بناءاً عن خبرتي وخبرات الناس اللي بسمعهم، وفي النهاية ده أكيد اختيارك اللي لازم يكون مبني عن قناعاتك الشخصية، وخبراتك اللي بتدعم القناعات دي أو بتغيرها، لأن الشخص الوحيد اللي هيتحمل نتايج أو خساير الإختيار ده هو إنت، بس الموضوع محتاج وعي وحرص شديد، عشان نقدر نحمي نفسنا من التورط مع أي حد ممكن يستغلنا بسبب احتياجه أو مرضه.

ماري منير

18/3/2015